Oktyabrın 29-da “Ziyalı Ocağı” İctimai Birliyi Bakı şəhəri Yasamal rayonu 13 nömrəli tam orta məktəbdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Uşaqların və yeniyetmələrin zərərli xarici təsirlərdən müdafiəsi” layihəsi çərçivəsində “Bu Vətən sənindir, səni çağırır” adlı maarifləndirici seminar təşkil edib.
Avropa.info xəbər verir ki, tədbir Azərbaycan Respublikasının Dövlət Himninin səsləndirilməsi və Vətən uğrunda canını fəda etmiş qəhrəman şəhidlərimizin əziz xatirəsinin bir dəqiqəlik sükutla yad edilməsi ilə başlanıb.
Seminarı giriş sözü ilə açan Bakı şəhəri Yasamal rayonu 13 nömrəli tam orta məktəbin direktoru, Əməkdar müəllim Yaqut Sadıqova tədbir iştirakçılarını və qonaqları salamlayaraq məktəb və şagirdlər barədə ətraflı məlumat verib.
Y. Sadıqova çıxışında vurğulayıb ki, uşaqların və yeniyetmələrin zərərli təsirlərdən qorunması müasir dövrün ən vacib məsələlərindən biridir:
“Bugünkü nəsilləri zərərli, təhlükəli xarici təsirlərdən qorumaq, onların yolunu, səmtini azdırmaq istəyən qüvvələrin qarşısını almaq ailədə valideynlərin, məktəbdə isə müəllimlərin üzərinə düşür. Mütəmadi nəzarət və vacib tövsiyyələrimizlə daima uşaqlarımızın- şagirdlərimizin yanında olmalıyıq”.
Direktor həmçinin qeyd edib ki, ölkəmiz bu gün dinc və firavan həyat yaşayır:
“Bu sakitliyi pozmaq istəyənlərə qarşı birgə mübarizə aparmalı, onların aramıza soxulmasına yol verməməliyik. Bugünkü tədbirin əsas məqsədi də məhz bu ideyaya xidmət edir”.
Layihə rəhbəri İlahə Əliyeva çıxışında müasir dünyada informasiya sistemlərinin sosial şəbəkələr üzərində qurulduğunu qeyd edib:
“İnternet şəbəkələrində, sosial platformalarda xalqlara, dövlətlərə qarşı informasiya savaşı hökm sürür. Birtərəfli, qərəzli təbliğatlar bir çox hallarda insanları çaşdırır, onlarda yanlış təsəvvürlər oyadır. Bu qəbildən olan təbliğatlar məkrli düşmənlərimiz tərəfindən ölkəmizə, xalqımıza qarşı da planlı şəkildə aparılır. Təbii ki, bizim və sizin ən başlıca vəzifəmiz bu mənfur qüvvələrə qarşı birgə mübarizə aparmaqdır. Xalqımıza, ölkəmizə qarşı təxribatçı qüvvələrin apardığı ideoloji hücumların qarşısını qətiyyətlə almalıyıq. Əleyhimizə aparılan ideoloji təxribatlara, zərərli və “zəhərli” xarici təsirlərə, habelə, mövcud cəmiyyət tərəfindən qınan və qəbul edilməyən yaşam tərzini beyinlərə yeritmək istəyənlərə qarşı çıxmalıyıq. Aldığımız informasiyaları sağlam, etibarlı, əmin mənbələrdən götürməliyik. Təmiz, saf “beynimizin qapısını” çirkin məqsədli qüvvələrə açmamalıyıq. Qətiyyən belə qüvvələrin bizi idarə etməsinə, özümüzün, xalqımızın, dövlətimizin sakitliyini, dincliyini pozmasına icazə verməməliyik”.
Layihənin eksperti Fuad Hüseynzadə isə “İnternetdən və sosial şəbəkələrdən düzgün istifadə” mövzusunda çıxış edib. O, sosial şəbəkələrin müasir dövrdə həm faydalı, həm də təhlükəli tərəflərinin olduğunu qeyd edib:
“Uşaqların və gənclərin vətənpərvərlik ruhunda tərbiyə edilməsi mənəvi dəyərlərimizin, xalqımıza məxsus ailə modelinin mühafizəsi deməkdir. Bəşəri ideyalar çərçivəsində formalaşan milli dəyərlərimiz müasir gəncliyin timsalında əmin əllərə tapşırılmalıdır. Sizin hər biriniz vəfalı, etibarlı və layiqli vətəndaş olaraq dilimizə, dinimizə, adət-ənənələrimizə, bütünlükdə, milli mentalitetimizə qarşı gözlənilən zərərli və zəhərli təsirlərin altına əsla düşməməli, hətta onlara qarşı çıxaraq, barışmaz və ardıcıl mövqe nümayiş etdirməlisiniz. Yabançı, qərəzli yad ünsürləri sizi olduğunuz doğru yoldan sapdırmasına əsla icazə verməyin. Siz doğru yolda addımlamaqla, sağlam düşüncənizlə xalqımızın parlaq gələcəyinin, aydın sabahlarının layiqli davamçılarısınız. Sizin məqsədiniz azad, müstəqil, layiqli və möhkəm əqidəli vətəndaş kimi xalqa, dövlətə xidmət etmək olmalıdır”.
Araşdrımaçı jurnalist Rəsul Mirhəşimli isə “İnternetin zərərli və zəhərli xüsusiyyətlərinin aşkarlanması” mövzusunda çıxış edərək, ideoloji təhlükəsizlik məsələlərinə toxunub:
“XXI əsr informasiya və texnologiya əsridir. Həyatımızın demək olar ki, hər sahəsində internet mühüm yer tutur. Xüsusilə də gənclər və yeniyetmələr üçün internet həm öyrənmə, həm ünsiyyət, həm də əyləncə vasitəsinə çevrilib. Lakin bu alət düzgün və məqsədyönlü istifadə olunmadıqda, ciddi mənfi nəticələrə də səbəb ola bilər”.
O həmçinin qeyd edib ki, internetdə anonimlik bəzən aqressiv davranışlara yol açır. “Bu zaman yeniyetmələr təhqir və alçaldılma ilə qarşılaşa bilər”, – deyə o əlavə edib.
Seminarın sonunda məktəb şagirdləri ilə maraqlı və canlı müzakirə aparılıb, onların sualları ekspertlər tərəfindən cavablandırılıb.
Tədbir iştirakçılar tərəfindən böyük maraqla qarşılanıb və layihənin maarifləndirici əhəmiyyəti yüksək qiymətləndirilib.
