“Ulus” Fəxri Ödüllər Fondu “Vətən Savaşçıları abidələri”nin monitorinqi, həmçinin gələcəkdə tikiləcək abidələrin optimal stilizasiyası barədə təkliflərin hazırlanması layihəsini icra edir. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir.
Layihənin əsas məqsədi ölkə ərazisində Vətən savaşçıları adına inşa edilmiş abidələrin və anım yerlərinin mövcud durumunun öyrənilməsi, yeni abidələrin memarlıq və heykəltəraşlıq tələblərinə uyğun layihələndirilməsi barədə mütəxəssis təkliflərinin hazırlanmasıdır. Bununla yanaşı, Mədəniyyət Nazirliyinin Mədəni İrsin Qorunması, İnkişafı və Bərpası üzrə Dövlət Xidmətinin müəyyən etdiyi qaydalara əsaslanan prosedurların dəqiqləşdirilməsi nəzərdə tutulur.
Layihənin tərəfdaşı Azərbaycan Bələdiyyələrinin Milli Assosiasiyasıdır. Bu əməkdaşlıq çərçivəsində hazırlanacaq təkliflər və örnəklər bütün bələdiyyələrə göndəriləcək.
Layihənin icrası müddətində abidələrin yüksək dəyər səviyyəsində inşası ilə bağlı tanıdıcı və öyrədici video-jurnal hazırlanacaq, qaydalar və nümunələri əks etdirən yaddaş bukleti bələdiyyələrə təqdim olunacaq.
“Ulus” Fəxri Ödüllər Fondundan Avropa.info-ya bildirilib ki, Vətən savaşçıları adına ucaldılan abidələr yalnız ehtiram rəmzi deyil, həm də milli ideologiyanın zənginləşməsinə, gənc nəslin vətənpərvərlik ruhunda tərbiyəsinə xidmət edən mənəvi dəyərdir. Abidələrin memarlıq və heykəltəraşlıq baxımından savaşın dramatizmini və xilaskarlıq missiyasını ifadə etməsi, həmçinin yaşayış məntəqələrinin görünən yerlərində ucaldılması onların əhəmiyyətini artırır və əbədiləşdirir.
Layihə nəticəsində ortaya qoyulacaq təkliflər abidələrin daha optimal şəkildə inşa olunmasına, müvafiq şərtlərin sənədləşdirilməsinə və icra prosesinin asanlaşdırılmasına xidmət edəcək.
