İsrailin baş naziri Netanyahu Qətərə hava hücumuna bəraət qazandırmaq istəyərkən bildirib ki, terrorçulara sığınacaq verən ölkələrin suverenliyi toxunulmaz sayıla bilməz və ölkəsinin HƏMAS rəhbərliyini aradan qaldırmaq məqsədilə həyata keçirdiyi əməliyyat beynəlxalq hüquqa zidd deyil.
Baş nazir Netanyahunun bu fikirllərinə münasibət bildirən sabiq millət vəkili Qulamhüseyn Əlibəyli Avropa.info-ya açıqlamasında qeyd edib ki, bu gün Yaxın və Orta Şərq regionunda ən böyük terrorçu İsrailin özüdür.
Qulamhüseyn Əlibəyli
Onun sözlərinə görə, terrorla mübarizə adı altında suveren dövlətlərin ərazisində terrorçuluqla məşğul olan, Qəzzada 50 mindən çox dinc sakini yalnız etnik mənsubiyyətinə görə qətlə yetirən, böyük bir ərazini blokadada saxlayan, oraya humanitar yardımı burxmayan, yardım aparanları bombalayıb öldürən, vicdanında (?) acından öldürdüyü qocaların, qadınların, uşaqların qanı olan, beynəlxalq hüquqla soyqırım və başqa cinayətlər törətdiyinə görə həbsinə beynəlxalq order verilən bir şəxsin anasını ağlatdığı beynəlxalq hüquqa istinad etməsi siyasi riyakarlığın, ikiüzlülüyün və həyasızlığın bariz nümunəsidir.
Q.Əlibəyli vurğulayıb ki, terrorçuluqla mübarizə aparmaq zəruridir:
“Lakin bu mübarizə terror yolu ilə aparılmamalı, dinc insanların etnik mənsubiyyətinə görə qətlinə, mülki əhalinin blokadada saxlanmasına, müəyyən etnosa mənsub olan şəxslərin əsrlər boyu yaşadığı torpaqlardan qovularaq, həmin ərazilərin zorla İsrailə ilhaq edilməsinə əsas ola bilməz. Bu gün terrorçuluqla mübarizə aparmaq istəyən İsrail strateji müttəfiqlik münasibətlərində olmasa da, yaxından əməkdaşlıq etdiyi Azərbaycandan çox şey öyrənə bilər. Nə 44 günlük Vətən müharibəsi, nə də bir günlük antiterror əməliyyatı zamanı bir nəfər də olsun burnu qanayan dinc erməni sakini tapılmadı.
BMT-nin məlum qətnaməsinin ziddinə olaraq, təxminən 80 il müddətində müstəqil Fələstin dövlətinin yaranmasına imkan verməməklə, fələstinlilər yaşayan əraziləri tədricən zorla ilhaq edərək, “Böyük İsrail” dövləti yaratmaq xülyasını gerşəkləşdirmək istəyənlər “Böyük Ermənistan” xülyasının acınacaqlı sonunu unutmasınlar”.
O qeyd edib ki, bu gün Yaxın və Orta Şərq regionunda terror probleminin həllinə yardım edəcək yollardan biri də müstəqil Fələstin dövlətinin yaranması ola bilər.
“Lakin görünür ki, müstəqil Fələstin dövlətinin yaranması Natanyahu kimilərə sərf eləmir. Bu tipli adamlara terrorçuluqla mübarizə adı altında terrorla məşğul olub başqa dövlətlərə təcavüz eləmək, başqa xalqların torpaqlarını ələ keçirib zorla ilhaq etmək daha şirnikləndirici görünür. “Terrorçulara sığınacaq verən ölkələrin suverenliyi toxunulmaz sayıla bilməz” fikri həm də faktiki olaraq terrorçuluqla məşğul olan dövlətlərin özlərini də legitim hədəf kimi nişan verir. Günlərin bir günü bu bəhanədən İsrailin özünə qarşı istifadə edən tapıla bilər və bu heç də təəcüblü olmaz, – deyə o, fikirlərini yekunlaşdırıb.
Avropa.info
