Sentyabrın 12-də Beynəlxalq Qalereyada “Gold School”, “Mir Talantov”, “Premium” Tədris Mərkəzləri və “Sabah” kurslarının müəllimi, xalçaçı rəssam Gülşən Mirzəyevanın tələbələri ilə birgə qrup sərgisi təşkil olunub. Qeyd edək ki, sərginin layihə rəhbəri Aygün Əzizovadır.
Avropa.info xəbər verir ki, sərgini giriş sözü ilə açan Beynəlxalq Qalereyanın direktoru Elnurə İsgəndərova sərgi iştirakçılarını salamlayıb və Gülşən Mirzəyevanın dörd tədris mərkəzinin tələbələri ilə birlikdə keçirdiyi bu qrup sərgisini kreativ və maraqlı təşəbbüs kimi qiymətləndirib.
Sərgidə fəxri qonaq qismində iştirak edən ADRA-nın müəllimi Zinaida Mirzəzadə, rəssam-müəllim Səadət Nərmin Hacıyeva, “Mir Talantov” Təhsil Mərkəzinin rəhbəri Elvira Şabanova, “Sabah” kurslarının rəhbəri Jalə Məmmədova, “Gold School” Tədris Mərkəzinin rəhbəri Jalə Abdullayeva, “Premium” Tədris Mərkəzinin rəhbəri Gülnar Səmədova və fizika müəllimi Mailə Yusubova sərgidə iştirak edən tələbələrə uğurlar arzulayıblar.
Çıxış edənlər bu cür sərgilərin gənc istedadların tanıdılmasına, sənətə marağın artırılmasına və tədris mərkəzləri arasında əməkdaşlığın güclənməsinə böyük töhfə verdiyini vurğulayıblar.
Qeyd olunub ki, Gülşən Mirzəyevanın xalça sənətini gənc nəslə ötürməsi milli irsimizin yaşadılması baxımından xüsusi əhəmiyyət daşıyır.
Sonda iştirakçılara diplomlar təqdim olunub və xatirə fotoları çəkilib.
Aygün Oqtay,
Fotolar Camalındır
