Beynəlxalq Qalereya və Ankara Rüzgarı Dərnəyinin birgə təşkilatçılığı ilə türkiyəli və azərbaycanlı rəssamların iştirakı ilə layihə rəhbəri Aygün Əzizovanın olduğu “Bir millət, iki dövlət” adlı qrup sərgisi keçirilib.
Avropa.info xəbər verir ki, sərgidə müxtəlif yaş qruplarını təmsil edən 80 rəssam iştirak edib.
Beynəlxalq Qalereyanın direktoru Elnurə İsgəndərova çıxışı zamanı Bakının işğaldan azad olunmasında Nuri Paşanın rəhbərliyi ilə Azərbaycanda döyüşən Qafqaz İslam Ordusunun xidmətlərindən, Türk şəhidlərinin şərəfinə Azərbaycanın müxtəlif bölgələrində ucaldılmış Türk Şəhidliyi abidələrindən və bu gün də davam edən Azərbaycan-Türkiyə qardaşlığından söz açıb.
E,isgəndərova qeyd edib ki, uzun illərdir Türkiyənin Azərbaycandakı səfirliyi ilə birgə Aygün Əzizovanın rəhbərliyi ilə qardaşlıq layihələri uğurla həyata keçirilir. Rəssamlar müxtəlif bölgələrdə yerləşən Türk Şəhidliklərinə etüd səfərlərinə aparılır və sonda bu əsərlər Nuri Paşa salonunda sərgilənir.
Layihə rəhbəri Aygün Əzizovaya isə çıxışında bildirib ki, artıq 2 ildir, bu sərgi üzərində Ankara Rüzgarı Dərnəyinin rəhbəri Hatice Erdi ilə birgə çalışırlar. O, sərginin uğurla keçdiyi üçün təşkilatçılığa dəstək olan bütün qurumlara və iştirakçı rəssamlara təşəkkür edib. Aygün Əzizova vurğulayıb ki, müxtəlif ölkələrlə həyata keçirilən sərgi layihələrinin məqsədi Azərbaycan mədəniyyətinə və incəsənətinə töhfə verməkdir.
Tədbirdə Ankara Rüzgarı Dərnəyinin rəhbəri Hatice Erdi, Remziye Kurttürk, Selma Akyüz və Mücella Ersoy çıxış ediblər. Türkiyədən öz əsərləri ilə sərgidə iştirak edən rəssamlar qarşılanmanın və təşkilatçılığın yüksək səviyyədə olduğunu bildirərək, əməkdaşlığın gələcəkdə də məmnuniyyətlə davam etdiriləcəyini vurğulayıblar.
Sərgiyə dəstək məqsədilə “NN Sweet” Şokolad Şirkətinin rəhbəri Nailə Rüstəmova da xüsusi şokolad hədiyyələri ilə iştirak edib.
Tədbirdə həmçinin qeyd edilib ki, bu sərgi təkcə sənət nümayişi deyil, eyni zamanda tarixə hörmət, mədəniyyətə sevgi və iki qardaş xalqın birliyinin simvoludur.
Tədbirin sonunda iştirakçılara sərgidə iştirak diplomları təqdim olunub və xatirə fotoları çəkilib.
Aygün Oqtay,
Fotolar Camalındır
