Avropa İttifaqının (Aİ) dəstəyi üç ildən artıq davam edən müharibəyə baxmayaraq, Ukraynanın öz suverenliyini qorumasına kömək etdi.
Avropa.info xəbər verir ki, bu barədə Avropa Şurasının sədri Antoniu Koşta Bolqarıstana səfəri çərçivəsində Bolqarıstanın Baş naziri Rosen Jelyazkovla birgə keçirdiyi brifinqdə bəyan edib.
Koşta Bolqarıstanın Şengen zonasına və Avrozonaya qoşulmasını məmnunluqla qarşıladığını bildirib.
O, Parisdə keçirilmiş “İstəkli Koalisiya” liderlərinin sammitini xatırladaraq qeyd edib ki, 26 ölkə Ukraynanın təhlükəsizliyi naminə səylərini birləşdirmək barədə razılığa gəlib. Bununla belə, hər bir ölkə bu prosesdə iştirak formasını özü müəyyən edəcək.
Şura sədrinin sözlərinə görə, Aİ Ukrayna Silahlı Qüvvələrinin hazırlığı və təlimləri üzrə missiyasını genişləndirəcək, eləcə də Ukraynanın müdafiə sənayesini dəstəkləməyə davam edəcək.
“Aİ-nin dəstəyi Ukraynanın suverenliyini üç ildən artıq davam edən müharibəyə rəğmən qorumasına kömək etdi. Bolqarıstan bu prosesə mühüm töhfə verib. Hərbi yardım, dəstək, təcrübə və Bolqarıstanın regional biliyi bizim səylərimizdə açar rol oynayır”, – Koşta bildirib.
Koşta Avropanın hibrid təhlükələrə qarşı mübarizə üçün alətlər hazırlamaq borcunda olduğunu qeyd edib.
“Rusiya Avropa ərazisində də hibrid hücum metodlarından istifadə edir. Kiberhücumlar, infrastrukturun dağıdılması və demokratiyanı sarsıtmaq cəhdləri təkcə Ukraynada deyil, ondan kənarda da müşahidə olunur”, – deyə o əlavə edib.
Bolqarıstanın Baş naziri Rosen Jelyazkov isə Qara dəniz regionundakı təhlükəsizlik problemlərinə diqqət çəkib.
“Bolqarıstan Rumıniya və Türkiyə ilə birlikdə Qara dəniz təhlükəsizlik zonası yaratmaq niyyətindədir”, – o bildirib.
Onun sözlərinə görə, Aİ-nin müdafiə və təhlükəsizlik qabiliyyətinin gücləndirilməsi Bolqarıstan üçün “xüsusi əhəmiyyət” daşıyır.
“Son illərdə müşahidə etdiyimiz aqressiv hərəkətlərin qarşısını almağın yeganə yolu müdafiə qabiliyyətidir. Ukraynanın davamlılığı və rifahı Avropada uzunmüddətli sülhün və rifahın təminatıdır. Qara dəniz regionu inteqrasiya və enerji müstəqilliyi baxımından böyük əhəmiyyətə malikdir. Aqressiya göstərdi ki, enerji, ticarət və humanitar təhlükəsizlik məsələləri təzyiq vasitəsi kimi istifadə oluna bilər. Qara dəniz təcrid olunmuş hövzə kimi deyil, Avropanın daha geniş təhlükəsizlik sisteminin ayrılmaz hissəsi kimi nəzərdən keçirilməlidir”, – deyə baş nazir vurğulayıb.
Koşta Aİ-yə üzv ölkələrin paytaxtlarına ardıcıl səfərlərini davam etdirir. Səfərlərin məqsədi gündəmdəki aktual məsələlər üzrə fikir mübadiləsi aparmaqdır.
