“Google” xidmətləri, o cümlədən “YouTube”, “Spotify” və axtarış sistemi Türkiyə də daxil olmaqla 10 ölkədə işləməz hala gəlib.
Avropa.info xəbər verir ki, sistemin çökməsi nəticəsində böyük bir xaos yaşanıb. Təxminən 30 dəqiqədən çox davam edən kəsintidən sonra “Google” xidmətlərinə giriş yavaş da olsa bərpa olunmağa başlayıb.
4 sentyabr 1998-ci ildə qurulan “Google” bu il 27-ci ildönümünü qeyd etməyə hazırlaşarkən əlçatmaz hala gəlib. “Google”da axtarış aparılsa da nəticələr görünməyib. Şirkətin xidmətləri təxminən yarım saat istifadə edilə bilməyib. “Google” tərəfindən hər hansı bir açıqlama verilməsə də, sosial media platformalarında “Google”a girişin mümkün olmadığı qeyd olunub.
“Google”un sahibi olduğu “YouTube” platformasına da giriş mümkün olmayıb. “Gmail”ə daxil olmaq da qeyri-mümkün olub. “Spotify”ın masaüstü versiyasına daxil olmaq mümkün olmayıb, mobil tətbiqdə isə mahnılar çalınırmış kimi görünsə də, səs gəlməyib. Hazırda Google xidmətlərinə giriş zəif də olsa yenidən mümkündür.
Türkiyənin nəqliyyat və infrastruktur nazirinin müavini Ömər Fatih Sayan deyib ki, “Google”, “Android” və ona bağlı xidmətlərdə Türkiyə və Avropa bölgəsini əhatə edən bir kəsinti yaşanır”. Sayan əlavə edib ki, Milli Kibertəhlükəsizlik Müdaxilə Mərkəzi (USOM) “Google”dan kəsintinin səbəbinə dair texniki hesabat tələb edib.
“Prosesi yaxından izləyirik. Bu cür kəsintilər yerli və milli məhsul və proqram təminatlarının nə qədər əhəmiyyətli olduğunu göstərir. Bu səbəbdən 5G texnologiyasının həm proqram, həm də avadanlıq hissəsində yerlilik nisbətini artırmaq üçün çox çalışdıq. Hazırda 60% olan yerlilik nisbətimizi daha da artıracağıq”, – deyə o qeyd edib.
Diqqət çəkən başqa bir məqam isə bu kəsintinin “Google”un yaranma gününə təsadüf etməsi olub. 4 sentyabr 1998-ci ildə qurulan şirkət 27-ci ildönümünü qeyd etməyə hazırlaşarkən belə böyük bir problemin yaşanması istifadəçilər arasında daha da böyük əks-səda doğurub.
