Əfqanıstanın şərqindəki Kunar əyalətində baş verən 6 bal gücündə zəlzələ nəticəsində 250-dən çox adamın öldüyü bildirilir.
Avropa.info xəbər verir ki, Əfqanıstan İnformasiya Nazirliyinin rəsmisi gecə saatlarında baş verən zəlzələ ilə bağlı açıqlama verib.
Zəlzələdən ən çox zərər çəkmiş bölgələrin Kunar vilayətində olduğunu və torpaq sürüşməsi səbəbindən yolların nəqliyyata bağlandığını qeyd edən rəsmi, axtarış-xilasetmə işlərinin vertolyotlarla aparıldığını bildirib.
Rəsmi zəlzələdə ilkin məlumatlara görə 250-dən çox insanın həyatını itirdiyini, 500-dən çox insanın isə yaralandığını və ölənlərin sayının artacağını gözlədiklərini bildirib.
Əfqanıstan müvəqqəti hökumətinin sözçüsü Zəbihullah Mücahid ABŞ-da yerləşən X şirkətinin sosial media platformasında verdiyi açıqlamada zəlzələdə ölənləri təsdiqləyib.
Mücahid, “Təəssüf ki, bugünkü zəlzələ şərq əyalətlərində can və mal itkisinə səbəb oldu” dedi.
Mücahid, xilasetmə işlərində yerli rəsmilərin və sakinlərin iştirak etdiyini, mərkəzi hökumət və ətraf əyalətlərdən gələn qrupların da bölgəyə yollandığını bildirib.
Ölkədə baş verən ən güclü zəlzələlərdən biri
Mücahid deyib: “Bütün mövcud resurslar insanların həyatını xilas etmək üçün istifadə olunacaq”.
Yerli rəsmilər bunun ölkədə baş verən ən güclü zəlzələlərdən biri olduğunu bildiriblər.
Bu arada, bölgədə birinin maqnitudası 5,2 bal olan ən azı iki yeraltı təkan qeydə alınıb.
Amerika Birləşmiş Ştatları Geoloji Xidməti (USGS) 6 bal gücündə zəlzələnin Əfqanıstanın Pakistan sərhədi yaxınlığında, Cəlalabaddan 27 kilometr şimal-şərqdə, 8 kilometr dərinlikdə baş verdiyini açıqlayıb.
