Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Əlilliyi Olan Uşaq və Gənclərin İdmana İnteqrasiyası” İctimai Birliyi tərəfindən “Əlilliyi olan uşaq və gənclər üçün idman yarışları” adlı layihə çərçivəsində Boccia idman növü üzrə yoldaşlıq yarışı həyata keçirilib.
Yarış Ramana Sağlamlıq İmkanları Məhdud Gənclərin Peşə Reabilitasiya Mərkəzinin Boccia idman zalında baş tutub. Layihə eyni zamanda “Konstitusiya və Suverenlik İli” çərçivəsində təşkil olunub.
Tədbirdə 30-dan çox uşaq və gənc iştirak edib, onlar yarışda güclərini sınayaraq əzmkarlıq nümayiş etdiriblər. Layihənin məqsədi əlilliyi olan uşaqları idmana cəlb etmək, onların təcrübəsini artırmaq, özünəinam hissini gücləndirmək, mübarizə əzmini inkişaf etdirmək və gələcəkdə beynəlxalq arenalarda ölkəmizi təmsil etməyə hazırlamaqdır.
Layihə üç ay müddətində həyata keçirilib və iki əsas tədbirdən – parataekvondo və boccia yarışlarından ibarət olub.
Təşkilatın sədri və layihə rəhbəri Aynur Məmmədova Avropa.info-ya açıqlamasında bildirib ki, bu cür layihələr uşaqların cəmiyyətə inteqrasiyasında və psixoloji inkişafında mühüm rol oynayır.
Yarışın sonunda qaliblərə medal və diplomlar təqdim olunub. Tədbir uşaqlarda və valideynlərdə böyük ruh yüksəkliyi yaradıb. Onlar bu cür layihələrin davamlı və mütəmadi olaraq keçirilməsini arzuladıqlarını bildiriblər.
