Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə 16 iyul 2025-ci il tarixində miqrant uşaqların cəmiyyətə inteqrasiyasına dəstək məqsədilə Zəfər Parkına maarifləndirici gəzinti təşkil olunub.
Avropa.info xəbər verir ki, səyahət zamanı uşaqlar Azərbaycan Respublikasının Silahlı Qüvvələrinin İkinci Qarabağ müharibəsində qazandığı şanlı qələbəyə həsr edilmiş Vətən Müharibəsi Memorial Kompleksi və Zəfər Parkı ilə tanış olublar.
Təlimçi Gülyaz Əsgərova bildirib ki, 30 il ərzində torpaqlarımızın 30 faizi işğal altında qalmış, 2020-ci ildə Ali Baş Komandan, Prezident cənab İlham Əliyevin rəhbərliyi ilə Azərbaycan Ordusu 44 gün davam edən Vətən müharibəsində bu torpaqları azad etmişdir.
Təlimçi uşaqlara Zəfər Parkının yaranma tarixi barədə də ətraflı məlumat verib. Qeyd olunub ki, müharibə zamanı düşməndən ələ keçirilən silah-sursat və texnikalar 2020-ci ilin Zəfər Paradında nümayiş etdirilmiş, daha sonra isə Dənizkənarı Bulvarda Qənimətlər Parkında sərgilənmişdir. Hazırda Vətən Müharibəsi Memorial Kompleksi və Zəfər Parkı xalqımızın qəhrəmanlığının, tarixi qələbəsinin və şəhidlərimizin əziz xatirəsinin əbədiləşdirilməsinin rəmzidir. Burada Zəfərin əsasında dayanan Lider–Xalq–Dövlət–Ordu birliyi xüsusi vurğulanır.
İmiqrant uşaqlar parkda nümayiş etdirilən hərbi texnikanı, xüsusilə də dağıdıcı gücə malik ağır silahların zərərsizləşdirilməsini böyük maraqla izləyiblər.
Gəzintidən sonra iştirakçılar Azərbaycan mətbəxinə məxsus ləziz təamlardan ibarət nahar süfrəsinə dəvət olunublar. Nahar zamanı müxtəlif şirin içkilər təqdim edilib, uşaqlar gördükləri barədə təəssüratlarını bölüşüblər.
