Beynəlxalq Qalereyada MM Tədris Mərkəzinin müəllim və tələbə kollektivi ilə birgə, layihə rəhbəri Aygün Əzizovanın təşkilatçılığı ilə “Rənglərin sehri” adlı qrup sərgisi keçirilib.
Avropa.info xəbər verir ki, qalereyanın qonaqpərvər zalında baş tutan bu tədbir gənc rəssamların yaradıcılıq enerjisini və müxtəlif texnikalarda işlənmiş əsərlərlə rənglərin gücünü ön plana çıxarıb.
Sərgini giriş sözü ilə açan Beynəlxalq Qalereyanın direktoru Elnurə İsgəndərova qonaqları və sərgi iştirakçılarını salamlayıb, MM Tədris Mərkəzinin geniş fəaliyyətindən və yerli, eləcə də beynəlxalq sərgilərdə fəal iştirakından danışıb. Bildirib ki, “Rənglərin Sehri” adlı bu qrup sərgisinə xüsusi həvəslə hazırlaşıblar və sərgidə müxtəlif texnikalarda işlənmiş 25 əsər nümayiş olunub.
Bu əsərlər gənc rəssamların dünyagörüşünü, fərdi yanaşmalarını və yaradıcı gücünü əks etdirir. Sərgi yalnız estetik zövq bəxş etmir, eyni zamanda gənc istedadların tanıdılması və təşviqi üçün bir platforma rolunu oynayır.
Belə sərgilər gənc yaradıcı ruhların cəmiyyətlə daha sıx təmas qurmasına, özünüifadə imkanlarının genişlənməsinə və peşəkar inkişaflarına zəmin yaradır. “Rənglərin Sehri” sərgisi bu yolda atılmış parlaq bir addım kimi qiymətləndirilib.
Tədbirdə MM Tədris Mərkəzinin rəhbəri Məhsəti Mehnətova, mərkəzin meneceri Aynurə İsmayılova, rəsm müəllimi Könül Məmmədli, fəxri qonaq – ADRA-nın müəllimi Zinaida Mirzəzadə, rəssam Nihad Əliyev, “Xalq” qəzetinin əməkdaşı Fidan Salmanova, həkim və rəssam Səadət Cəfərova, vokalist və rəssam Aynur Yunusova, rəssam və müəllim Mehriban Zeynalova, eləcə də rəssam Pərvanə Əhmədli çıxış edərək MM Tədris Mərkəzinə uğurlar arzulayıb, sərginin möhtəşəm olduğunu bildiriblər.
Sonda iştirakçılar diplomlarla təltif olunub, xatirə fotoları çəkilib.
Aygün Oqtay,
Fotolar Camalındır
