İsrail ordusunun səhər saatlarından Qəzza zolağının müxtəlif bölgələrinə təşkil etdiyi hücumlarda ən azı 89 fələstinli ölüb, 41-i yardım gözləyən onlarla mülki şəxs yaralanıb.
Avropa.info xəbər verir ki, Qəzzanın blokadasını gücləndirərək və yardım axınını məhdudlaşdıraraq humanitar fəlakətə səbəb olan İsrail, məcburi köçkün fələstinlilərin çadırlarını, yardım istəyən mülki vətəndaşları və yaşayış məntəqələrini hədəfə alıb.
Səhiyyə mənbələri və hadisə şahidlərinin verdiyi məlumata görə, Qəzza zolağının cənubundakı Xan Yunus və Rəfah şəhərləri arasındakı “Moraq dəhlizi” ətrafında İsrail ordusunun humanitar yardım maşınlarını gözləyən fələstinlilərə atəş açması nəticəsində 28 nəfər həlak olub.
Şimalda Zikim Sərhəd Qapısı yaxınlığında yardım yük maşınlarını mühafizə edən 6 təhlükəsizlik işçisi də açılan atəş nəticəsində həlak olub.
Mərkəzi bölgədəki Nusayrat Qaçqınlar Düşərgəsində köçkünlərin yaşadığı çadırın hədəfə alınması nəticəsində 5 nəfər həyatını itirib.
Qəzzanın şərqindəki Derej məhəlləsində yaşayış binasına edilən hücumda 3 nəfər həlak olub. İsrail döyüş təyyarələrinin köçkün fələstinlilərin sığındığı şəhərin şimalındakı Saftavi bölgəsində məktəbi hədəfə alması nəticəsində 2 fələstinli ölüb, bir neçəsi yaralanıb .
Mərkəzi rayonda ABŞ-ın yardım paylama məntəqəsi adlanan yerdə gözləyən mülki şəxsləri hədəf alan hücumlarda 7 nəfər ölüb, ən azı 22 nəfər yaralanıb .
Əl-Mağazi qaçqın düşərgəsindəki evə hücum zamanı eyni ailənin 3 üzvü həlak olub. Deyr əl-Bələhdə bir evə edilən hücumda bir qadın da həlak olub.
Xan Yunisdə bir ailənin evi bombalanıb
Qəzzanın cənubunda Xan Yunisin qərbindəki Əl-Məvasi bölgəsində “Zareb” ailəsinə məxsus ev bombalanıb; 10 nəfər həlak olub, 30-dan çox insan yaralanıb və çoxlu sayda insan dağıntılar altında qalıb.
Eyni şəhərin Yapon məhəlləsində bir ev də hədəfə alınıb və beş nəfər həyatını itirib.
İsrailin Qəzzanın cənubunda və mərkəzində həyata keçirdiyi hücumlarda ən azı 19 nəfər həlak olub.
