Suriyanın cənubundakı Suveyda şəhərində hökumət qüvvələri ilə yerli dürzi militanlar arasında toqquşmalar yenidən başlayıb. Avropa.info xəbər verir ki, iyulun 15-də əməliyyatlarını Suriyanın cənubundakı Suveyda və Dəraa ilə hücumlarını məhdudlaşdıran İsrail Dəməşqdəki Baş Qərargah binası və Prezident Sarayını vurub.
Hücumlar Suriya hökumət qüvvələrinin şəhərə nəzarəti ələ keçirməsindən bir gün sonra Suveydada döyüşlərin bərpa olunduğunu elan etdiyi vaxta təsadüf edib. Suriyanın rəsmi xəbər agentliyi SANA bildirib ki, qanunsuz qruplaşmalar Suveydadakı milli xəstəxanadan ordu və daxili təhlükəsizlik qüvvələrinə qarşı əməliyyatlar üçün mərkəz kimi istifadə edir.
Müdafiə Nazirliyinin Media və Kommunikasiyalar İdarəsi silahlı qruplaşmaların çoxsaylı snayperlərinin xəstəxananın damında yerləşdirildiyini və hökumət qüvvələrini intensiv şəkildə hədəfə aldığını bildirib.
(15:27)
***
İsrail ordusunun sözçüsü Aviçay Adraee iyulun 16-da Suriya ordusunun paytaxt Dəməşqdəki Baş Qərargah ofisinin girişinə hücum etdiyini bildirib. Avropa.info xəbər verir ki, Adraee açıqlamasında İsrailin “Suriyada dürzi vətəndaşlarla hökumət qüvvələri arasındakı qarşıdurmaları izlədiyini”, bölgədə hücumlar həyata keçirdiklərini və müxtəlif ssenarilərə hazır olduqlarını bildirib.
Suriyanın dövlət xəbər agentliyi SANA paytaxt Dəməşqdə partlayış səsinin eşidildiyini bildirib. Suriya dövlət televiziyası isə İsrailə məxsus pilotsuz təyyarələrin (PUA) paytaxt üzərində uçduğunu bildirib. Məlumatlara görə, İsrailin pilotsuz təyyarələri ölkənin cənubundakı Suveyda şəhərini hədəfə alıb və çoxlu sayda mülki şəxs yaralanıb.
İsrail ordusu Dəməşqdəki ordunun Baş Qərargah binasının giriş qapısına hücum etdiyini açıqlayıb. Suriyanın iki təhlükəsizlik mənbəsi Reuters agentliyinə bildirib ki, İsrailin zərbəsi paytaxtdakı Müdafiə Nazirliyinin binasını hədəf alıb.
Suriya Xarici İşlər Nazirliyi dünən yaydığı bəyanatda Suriyanın cənubundakı son hücumlar və onların nəticələrinə görə tam olaraq İsraili məsuliyyət daşıdığını bildirib. Nazirlik, istisnasız olaraq bütün vətəndaşlarını qorumağa sadiq olduğunu, bunlar arasında ən çox diqqət çəkən dürzi vətəndaşlarının olduğunu vurğulanıb.
Xarici İşlər Nazirliyi dünən səhər saatlarında İsrailin Suriyanın cənubunda həyata keçirdiyi hücumlarda çoxlu sayda əsgər, təhlükəsizlik işçisi və mülki vətəndaşın həlak olduğunu bildirib.
Nazirlik, hücumların “dövlətin təhlükəsizliyi gücləndirməyə və müharibənin təsirlərini aradan qaldırmağa çalışdığı kritik bir zamanda milli sabitliyi pozmaq və Suriya birliyini pozmaq məqsədi ilə diqqətlə planlaşdırıldığını və şübhəli kontekstdə həyata keçirildiyini” bildirib.
Bəyanatda, Suveyda xalqını “dövlətinin və ordusunun arxasında dayanmağa və şübhəli layihələrə və ya xaosa səbəb olan çağırışlara aldanmamağa” çağırılıb.
Suriyanın cənubunda, əsasən dürzilərin məskunlaşdığı Suveyda bölgəsində son iki gündə baş verən qarşıdurmalarda azı 90 nəfər ölüb, yüzlərlə insan yaralanıb.
İsrail Suriyanın cənubundakı Suveyda bölgəsində baş verən hadisələrə hərbi yolla cavab verib. İsrailin baş naziri Binyamin Netanyahu və müdafiə naziri Yisrael Katz, Suveyda əyalətində yerləşdirilən Suriya ordusu qüvvələrini vurma əmri verdiklərini bildirdilər. Bu əmr Suriya hökumət qüvvələrini hədəf alan hava zərbələri ilə dərhal həyata keçirilib.
İsrail ordusu həmçinin, Suveydada Suriya hərbi maşınlarına zərbələr endirməyə başladığını açıqlayıb. İsrail Ordusunun sözçüsü Aviçay Adraee X hesabında verdiyi açıqlamada bunları deyib: “İsrail ordusu siyasi səviyyədən gələn əmrlərdən sonra Suriyanın cənubundakı Suveyda bölgəsində Suriya rejiminə məxsus hərbi maşınlara hücum etməyə başladı. Bu hücum dünən Suveyda bölgəsinə doğru hərəkət edən zirehli personal daşıyıcısı və tank karvanlarının bölgəyə girişinin qarşısını almaq üçün yolları bombalanıb”.
İsrail ordusunun bombardımanlarına baxmayaraq, Suriya ordusu birlikləri ağır zirehli texnikanın müşayətində Suveyda şəhərinə daxil olub. Daha öncə Suriya hökumət qüvvələrinə qarşı qarşıdurmalara çağıran dürzi şeyxi Hikmət əl Hicri də daxil olmaqla dürzi liderlər şəhər sakinlərini hərbçilərə qarşı çıxmamağa çağırıblar.
Dürzilərin Ruhani Rəhbərliyi hökumət qüvvələrinin Suveydaya daxil olmasını alqışlayıb və silahlı qrupları hökumətlə əməkdaşlığa, silahlarını Daxili İşlər Nazirliyinə təhvil verməyə çağırıb.
Beləliklə, Suriya prezidenti Əhməd Şaraanın keçən ilin sonunda hakimiyyətə gəlməsindən sonra ilk dəfə hökumət qüvvələri Sveydaya daxil olub. Şəhər daha öncə İsrail hərbi birləşmələri tərəfindən “toxunulmaz zona” elan olunmuş və Suriya hökumət qüvvələrinin bölgədə hakimiyyətini bərpa etməsinə imkan verilmirdi.
Bəzi ekspertlər dürzilərin yaşadığı Suveyda şəhərini İsrailin Suriyanı bölmək üçün planlaşdırdığı “Troya atı” adlandırırlar. Dəməşqlə danışıqlara davam edən Tel-Əviv Suriyanın cənubunda bəzi bölgələri işğal edib.
Avropa.info
