“Dünən terror təşkilatı konkret olaraq tərkisilah ilə bağlı mərasim keçirdi. Dünəndən etibarən 47 illik terror bəlası, İnşallah, sona çatma prosesinə girdi.”
Avropa.info xəbər verir ki, bunu Türkiyə prezidenti Rəcəb Tayyib Ərdoğan Ədalət və İnkişaf Partiyasının Kızılcahamamda keçirdiyi toplantısında bildirib.
Ərdoğan iyulun 11-də İraqın şimalında PKK-nın tərkisilah prosesinə başlamasını tarixi gün olaraq dəyərləndirib. Türkiyə Prezidentinin fikirincə, ölkəsi uzun, ağrılı və göz yaşları ilə dolu bir səhifəni bağlamağa başlayıb. “Unutmayaq ki, bu gün yeni bir gündür. Bu gün tarixdə yeni bir səhifə açıldı. Bu gün böyük bir Türkiyənin, güclü bir Türkiyənin, bir Türk Əsrinin qapıları açıldı”, – deyə Ərdoğan bildirib.
1984-cü ildə terror təşkilatının ilk hücumundan bu yana Türkiyənin terrora son qoymaq üçün hər vasitə və üsula əl atdığını ifadə edən Ərdoğan, “Terrorsuz Türkiyə” planının önəmini vurğulayıb.
“Dünyanın hər yerindən nümunələrə baxsaq, terrora son qoymaq üçün silahlı mübarizədən kənar düsturlar çalışılıb. Lakin heç biri uğur qazana bilmədi. Son zamanlar həyata keçirdiyimiz “Terrordan Azad Türkiyə” layihəsi nə danışıqların, nə sövdələşmənin, nə də “ver-al” prosesinin nəticəsi deyil. Ona görə də biz bu gün hər təşəbbüsü daha da diqqətlə izləyirik. Türkiyə Cümhuriyyətinin qürurunu alçaltmağa imkan verməyəcəyik“, – deyə Türkiyə Prezidenti bildirib.
Ərdoğan, MHP sədri Baxçalı və komandasının “Terrorsuz Türkiyə” üçün canlarını, qanlarını, bütün təcrübələrini fəda etdiyini vurğulayaraq, Türkiyənin xeyrinə olmayan heç bir işə qarışmadıqlarını bildirib.
“Bizi Türkiyəyə fayda gətirən hər təşəbbüsün önündə görəcəksiniz. Və Türkiyənin xeyrinə olmayan hər təşəbbüsün önündə, o təşəbbüsün qarşısında bizi görəcəksiniz. Biz nə etdiyimizi dəqiq bilirik. Onların heç kimdən qorxması, narahat olması lazım deyil. Biz nə ediriksə, bunu Türkiyə üçün edirik, biz bunu müstəqilliyimiz üçün edirik”, – deyə Ərdoğan bildirib.
Terrorun son məqsədinin Türkiyəni parçalamaq olmadığını ifadə edən Ərdoğan, “Heç kimin Türkiyəni parçalamağa gücü çatmaz. Amma bizi gecikdirdilər, vaxt itirdik, iqtisadi itkilər verdik, enerjimizi israf etdilər. Ən çox da türk-kürd arasına nifaq salmağa çalışdılar. 41 ildə kim qalib gəldi? Terror baronları, terror sektoru ilə qidalananları qazandı”, deyib.
Ərdoğan keçmişdəki bəzi Türkiyə hökumətlərinin “terrorun kökünü kəsəcəyik” sözü verdiyini, ancaq yanlış addımların atıldığını bildirib.
“Ağ Toros qətliamları, üstü açılmayan qətllər və Diyarbəkir həbsxanasındakı işgəncələr bunların arasında idi. Kəndlər yandırıldı, insanlar bir gecədə köçməyə məcbur oldular, həbsxanada uşaqları ilə kürdcə danışa bilməyən analar bu yaramazlıqlardan yalnız bir neçəsidir. Bu qeyri-qanuni mübarizə üsulları terrora son qoymaq əvəzinə, əksinə, onu qızışdırmış və gücləndirmiş, terror təşkilatının istismarı üçün münbit şərait yaratmışdır”, – deyə Türkiyə Prezidenti qeyd edib.
Ərdoğan “Terrorsuz Türkiyə” projesinin davamı üçün Türkiyə Böyük Millət Məclisində komissiya yaradılacağını və Ədalət və İnkişaf Partiyası, MHP, DEM Partiya nümayəndə heyətləri ilə birlikdə bu prosesi inkişaf etdirəcəklərini qeyd edib.
Avropa.info
