Türkiyə ilə Quzey Kıbrıs Türk Cümhuriyyəti (KKTC) arasında KKTC-nin fiber optik infrastrukturunun inkişaf etdirilməsi və fiber optik kabellər vasitəsilə təqdim olunan xidmətlərin evlərə və müəssisələrə çatdırılması məqsədilə əməkdaşlıq protokolu imzalanıb.
Avropa.info xəbər verir ki, KKTC-nin rəqəmsal infrastrukturunun fiberə keçidi çərçivəsində təşkil olunan imza mərasimində KKTC Prezidenti Ersin Tatar, Türkiyə Cümhuriyyətinin Vitse-prezidenti Cevdet Yılmaz, KKTC-nin Baş naziri Ünal Üstel və “Türk Telekom”un baş direktoru (CEO) Ümit Önal iştirak ediblər. KKTC-ni sualtı fiber xətləri ilə dünyaya birləşdirən, Türkiyənin rəqəmsal dönüşüm lideri olan “Türk Telekom” KKTC-dəki istifadəçiləri yüksək sürətli fiber internetlə təmin edəcək.
Cevdet Yılmaz öz çıxışında bu layihənin Türkiyə və KKTC arasındakı güclü həmrəyliyin daha bir simvolu olduğunu vurğulayıb.
Yaşıl, rəqəmsal və sosial dönüşümün artıq bütün siyasətlərin mərkəzində olduğunu qeyd edən Yılmaz bu gün suverenliyin məlumat təhlükəsizliyi, texnoloji bacarıq və informasiyaya çıxış imkanı ilə müəyyən olunduğunu bildirib. O, milli rəqəmsal infrastrukturun vacibliyinə diqqət çəkərək, bunun suverenlik və milli təhlükəsizliyin ayrılmaz tərkib hissəsi olduğunu söyləyib.
Türkiyənin bu sahədəki milli təcrübəsinin KKTC-də evlərə və iş yerlərinə yüksək sürətli, fasiləsiz və təhlükəsiz internet xidmətini təmin edəcəyini qeyd edən Cevdet Yılmaz bu gün başlayan prosesin KKTC-nin rəqəmsallaşma yolunda strateji bir addımın başlanğıcı olduğunu bildirib.
E-dövlət xidmətlərinin güclü rəqəmsal infrastruktura bağlı olduğunu deyən Yılmaz rəqəmsal dövlət nə qədər inkişaf edərsə, vətəndaş-dövlət münasibətlərinin bir o qədər sağlam zəminə oturacağını vurğulayıb. O, bu işlərin bir il ərzində tamamlanmasının hədəfləndiyini və bir il sonra KKTC-nin fərqli bir infrastruktur sisteminə sahib olacağını bildirib.
“Türkiyə əsri, KKTC-nin də əsri olacaq” deyən Yılmaz KKTC-yə tətbiq edilən insanlıqdan uzaq embarqolara da etirazını bildirib. “Hansı qapını bağlayırlarsa, bağlasınlar, biz açacaq bir qapı tapacağıq”, – deyə o qeyd edib. Layihənin gənclər üçün əhəmiyyətini vurğulayan Yılmaz onlara dəstək verməyə davam edəcəklərini qeyd edib.
KKTC Prezidenti Ersin Tatar isə çıxışında KKTC-nin müstəqil bir Türk dövləti olaraq dünyada yerini aldığını vurğulayıb.
Tatar imzalanan protokolla KKTC-nin bir dövrü daha geridə qoyaraq irəli getdiyini qeyd edib.
O, çıxışında embarqo və izolasiya şəraitində olan KKTC-yə inanaraq, sərmayə qoyan iş adamlarına təşəkkür edib və protokolun ölkə üçün xeyirli olmasını diləyib.
Tədbirdə çıxış edən KKTC-nin Baş naziri Ünal Üstel isə hökumətə gəldikləri gündən koalisiya tərəfdaşları ilə birlikdə xalqa problemlərin həll ediləcəyi vədini verdiklərini xatırladıb.
Kıbrıs Türk xalqının daha rahat, xoşbəxt və dinc şəraitdə yaşaması üçün uzun müddət gözləyən qanunların bir-bir qəbul edildiyini bildirən Üstel gözləmədə olan layihələrin 3,5 il ərzində tamamlandığını və Türkiyə Cümhuriyyəti ilə imzalanan protokollarla bir çox layihənin həyata keçirildiyini deyib.
Baş nazir Türkiyə Prezidenti Rəcəb Tayyib Ərdoğana, Vitse-prezident Cevdet Yılmaza və Türkiyənin Lefkoşadakı səfirinə KKTC xalqı adından təşəkkür edib.
“Bu gün də tarixi bir layihəyə imza atılır. ‘KKTC artıq dünyada informasiya texnologiyaları adası olaraq tanınacaq”, – deyən Üstel bu layihə sayəsində turizm, təhsil, proqram təminatı və bütün sektorların daha müasir, daha vizioner bir formaya qovuşacağını qeyd edib.
Üstel təxminən 100 milyon dollarlıq bu sərmayə ilə ölkənin böyük bir hissəsinə xidmət çatdırılacağını və dünyanın hər yerindən insanların KKTC-nin necə rəqəmsal bir infrastruktura sahib olduğunu görəcəyini bildirib.
“Türk Telekom”un Baş direktoru Ümit Önal isə çıxışında bunları deyib:
“Türk Telekom olaraq güclü fiber infrastrukturumuz və texnologiya biliklərimiz ilə rəqəmsal dönüşümdə öncül rol oynayırıq. Türkiyədə fiber infrastrukturumuzla rəqəmsallaşmanın təməlini necə möhkəmləndirdiksə, indi də Quzey Kıbrıs Türk Cümhuriyyətinin rəqəmsal gələcəyinə töhfə verməkdən qürur duyuruq. KKTC-nin rəqəmsal infrastrukturunun gücləndirilməsini və evlərə, müəssisələrə qədər fiber internet çatdırılmasını həyata keçirəcəyik. Türkiyə Cümhuriyyəti hökuməti və KKTC hökuməti arasında imzalanan və həyata keçəcək bu layihə, infrastruktur sərmayəsindən əlavə, KKTC-nin təhsildən iqtisadiyyata, səhiyyədən dövlət xidmətlərinə qədər bir çox sahədə rəqəmsallaşmasını dəstəkləyəcək bir fiberləşmə kampaniyasıdır. Türk Telekom olaraq texnologiyamızı, məlumat biliklərimizi və güclü infrastruktur təcrübəmizi KKTC-nin rəqəmsal dönüşümünə təqdim etməkdən məmnunuq”.
