Keçmiş Pentaqon rəsmisi İsrailin ehtiyatda saxladığı köhnə Patriot raket batareyası və yüzlərlə raketdən müdafiə sistemlərini Rusiya hücumlarına qarşı Ukraynaya verməli olduğunu bildirib.
Avropa.info-nun məlumatına görə, ABŞ müdafiə naziri Pit Heqsetin keçmiş baş müşaviri Den Koldvel X hesabında yazır: “Tramp Ukraynanı daha çox hava hücumundan müdafiə sistemi ilə təmin etmək istədiyini açıq şəkildə ifadə etdi. Bunu nəzərə alaraq, İsrailin artıq istifadə etmədiyi Patriot PAC-2 raketlərini Ukraynaya verməli olduğuna inanıram.”
Eks Pentaqon rəsmisinin dediyinə görə, İsrail ABŞ-a yenilənməsi üçün bir Patriot batareyası və təxminən 90 raket təqdim edib. Açıq mənbədən yayılan məlumatlarına görə, İsrailin anbarlarında köhnəlmiş daha səkkiz batareya və bir neçə yüz raket var.
“12 günlük müharibə zamanı İsrailin müdafiəsində ABŞ HHM-lərinin iştirakını nəzərə alsaq, Vaşinqtonun İsraildən köhnəlmiş Patriot ehtiyatlarının bir hissəsini Ukraynaya verməsini tələb etmək üçün kifayət qədər əsasları var”, – deyə Pentaqon rəsmisi qeyd edir.
Tel-Əviv niyə istifadə etmədiyi raketləri Kiyevə vermir?
ABŞ prezidenti Donald Tramp rusiyalı həmkarı Vladimir Putinlə sülh danışıqlarının dalana dirənməsi ilə bağlı artan məyusluğunu ifadə edərək Rusiya prezidentini “boş-boş danışmaqda” ittiham edib. Məhz bundan sonra ABŞ prezidenti Ukraynaya 10 ədəd raketdən müdafiə sistemi göndərəcəyini açıqladı. Trampın bu vədi Pentaqona Patriot raketdən müdafiə sistemlərinin qiymətli əmtəə olduğu faktını yenidən xatırlatdı.
Məlumatlara görə, Tramp administrasiyası bundan sonra ən azı bir ədəd köhnə Patriot batareyasını İsraildən apararaq, Ukraynaya göndərməzdən əvvəl təkmilləşdirmə işləri həyata keçirir. İsrailin anbarlarında istifadəsiz qalan digər köhnə Patriot batareyaları da geri istənir.
Qərb mediasına sızdırılan gizli bilgilərə görə, Ukrayna Rusiya işğalının ilk illərində ABŞ, Hollandiya və Almaniyadan Pac-3 raketlər alıb. İsrail isə Ukraynanın ehtiyaclarını ödəyəcək Pac-2 raketlərinin ehtiyatını əlində saxlayır. Tel-Əviv Dəmir Qübbə, David Sapandı, Arrow 2 və Arrow 3 sistemlərindən ibarət üç pilləli hava hücumundan müdafiə sistemini inkişaf etdirərkən Pac-2 hava hücumundan müdafiə sistemlərini deaktiv edib. Lakin, istifadə edilməyən bu sistemlər Kiyevə verilmir.
İsrail Rusiyanın 2022-ci ildə işğalından sonra Ukraynanın silah və sursatla bağlı bütün tələblərini yerinə yetirməkdən çəkinir. İsrailin əsas arqumentlərindən biri Suriyada hava hücumundan müdafiə sistemini saxlayan, lakin İsrail döyüş təyyarələrinin İran hədəflərini bombalamasına icazə verən Moskvanı qəzəbləndirməməsi idi. Lakin, Rusiya-İranın müttəfiqi Bəşər Əsəd 2024-cü ilin dekabrında devrildikdən sonra vəziyyət dəyişib.
Bununla belə Tel-Əviv Moskvanın İranın bütün tələblərinə baxmayaraq, S-400 Havadan Müdafiə Sistemlərini Tehrana satmamasını əsas göstərərək, Kievə silah verməkdən boyun qaçırır.
Müəllif: Avropa.info Analitik Qrupu
