ABŞ prezidenti Donald Tramp 2024-cü il noyabrın 5-də seçki kampaniyası zamanı Rusiya ilə Ukrayna arasında müharibəni 24 saat ərzində bitirə biləcəyini iddia etmişdi.
İddialara görə, Tramp Rusiyanı müharibədən əl çəkməyə inandırmaq üçün kampaniya donorları ilə təkbətək görüşlərdə Moskvanı bombalamaqla hədələyib.
Avropa.info-nun məlumatına görə, Donald Trampın Nyu-York və Floridada qapalı görüşləri ilə bağlı səs yazıları ortaya çıxıb. Səs yazılarından görünür ki, Tramp Rusiya prezidenti Vladimir Putini Ukraynaya hücumdan çəkindirmək üçün onu cavab zərbəsi ilə hədələdiyini bildirir.
Tramp, “Mən Putinə dedim ki, “Ukrayna savaşını bitirməsən, Moskvanı bombalayacam. Başqa seçimim yoxdur. Putin isə “sənə inanmıram” cavabını verdi. Amma o, mənə 10% inandı”, – deyə bildirir.
Tramp kampaniya donorları ilə görüşündə daha sonra qeyd edir: “Bu müharibə heç vaxt başlamamalı idi. Prezident Putindən razı deyiləm. Keçən həftə 7 min insan öldü. Onların əksəriyyəti əsgər idi, amma bunlar candır. Bunu dayandıra bilsəm, bu, insanlıq üçün ən böyük missiya olardı”.
Tramp həmçinin iddia edib ki, ABŞ-ın keçmiş prezidenti Co Baydenin yerinə vəzifədə olsaydı, Ukrayna və Qəzzadakı münaqişələr baş verməzdi.
Tramp Çin prezidenti Si Cinpinə də oxşar xəbərdarlıq etdiyini bildirib.
Cinpinə Tayvana mümkün bir işğalla bağlı xəbərdarlıq etdiyini qeyd edən Tramp, “Xi-yə “Tayvana hücum etsəniz, Pekini bombalayacağıq” dedim. O, məni dəli hesab edirdi, amma heç bir problemimiz yox idi”.
