Azərbaycan Respublikasının Prezidenti İlham Əliyev Birləşmiş Ərəb Əmirliklərinin paytaxtı Əbu-Dabiyə işgüzar səfərə gəlib.
Zayed Beynəlxalq Aeroportunda Azərbaycan Prezidentinin şərəfinə fəxri qarovul dəstəsi düzülüb.
Prezident İlham Əliyev Birləşmiş Ərəb Əmirliklərinin vitse-prezidenti, Baş nazirin müavini, Birləşmiş Ərəb Əmirliklərinin Prezident Şurasının (Divan) sədri Şeyx Mənsur bin Zayed Əl Nəhyan və digər rəsmi şəxslərlə görüşüb.
Əbu-Dabidə Azərbaycan Prezidenti İlham Əliyevin və Birləşmiş Ərəb Əmirliklərinin Prezidenti Şeyx Məhəmməd bin Zayed Əl Nəhyanın görüşü olub.
Bu barədə Prezidentin rəsmi saytında məlumat verilib.
Görüşdə Azərbaycan ilə Birləşmiş Ərəb Əmirlikləri arasında dostluq və qardaşlığa əsaslanan münasibətlərin strateji tərəfdaşlıq xarakteri daşıdığı, siyasi əlaqələrin yüksək səviyyədə olduğu, ticari-iqtisadi əməkdaşlığın inkişaf etdiyi vurğulanıb.
Prezident İlham Əliyevin cari ilin yanvar ayında Birləşmiş Ərəb Əmirliklərinə və Prezident Şeyx Məhəmməd bin Zayed Əl Nəhyanın Azərbaycana səfərləri məmnunluqla qarşılanıb və bu səfərlər zamanı ikitərəfli gündəliyin müxtəlif sahələrini əhatə edən ətraflı müzakirələrin aparıldığı bildirilib.
Görüşdə ikitərəfli əlaqələrə dair fikir mübadiləsi aparılıb, ölkələrimiz arasında enerji sektorunda, o cümlədən bərpa olunan enerji sahəsində uğurlu əməkdaşlıq qeyd olunub, bu sahədə perspektiv layihələr müzakirə olunub.
SOCAR ilə ADNOC, Türkiyə ilə Masdar arasında bərpa olunan enerji sahəsində əməkdaşlıq məmnunluqla ifadə olunub.
Görüşdə İqtisadi Əməkdaşlıq Təşkilatının Xankəndidə keçirilən Zirvə toplantısının əhəmiyyəti vurğulanıb, Birləşmiş Ərəb Əmirliklərinin bu tədbirdə yüksək səviyyədə təmsil olunması alqışlanıb.
Daha sonra prezidentlərin iştirakı ilə “Azərbaycan Respublikası Hökuməti və Birləşmiş Ərəb Əmirlikləri Hökuməti arasında Hərtərəfli İqtisadi Tərəfdaşlıq Sazişi” imzalanıb.
Görüşün sonunda dövlət başçısı Birləşmiş Ərəb Əmirliklərinin Prezidentinə xatirə hədiyyəsi təqdim edib.
Azərbaycan və Ermənistan arasında davam edən sülh prosesi çərçivəsində iyulun 10-da Birləşmiş Ərəb Əmirliklərinin paytaxtı Əbu-Dabidə Azərbaycan prezidenti İlham Əliyev və Ermənistanın baş naziri Nikol Paşinyan arasında ikitərəfli görüş keçiriləcək.
Bu barədə Prezidentin rəsmi saytında məlumat verilib.
