PKK-nın Mərmərə dənizindəki İmralı adasında ömürlük həbsdə olan lideri Abdulllah Öcalan çərşənbə günü ilk dəfə öz tərəfdarlarına video müraciət edərək Türkiyəyə qarşı terror aktlarının bitdiyini və demokratik siyasətə keçidin vaxtının gəldiyini bəyan edib.
Avropa.info-nun məlumatına görə, bu ilin fevral ayında etdiyi yazılı açıqlamada PKK-nın ləğvini tələb edən Abdullah Öcalan yeni videoda Türkiyə parlamentinin tərksilah məsələsinə nəzarət edəcək komissiya yaratmalı olduğunu bildirib. Türkiyəyə qarşı 40 il silahlı hücumlar edən, ABŞ və AB tərəfindən terror təşkilatı elan edilən PKK, Öcalanın göstərişi ilə may ayında özünü ləğv ediyini açıqlayıb.
Yeddi dəqiqəlik videoda açıq rəngli polo köynək geyinmiş və qarşısında stolun üstündə bir stəkan su olan Öcalan öncədən yazdığı çıxışı oxuyur. Onun yanında isə kameraya baxan daha 6 PKK üzvü vardı. O, PKK-nın dövlət qurma planlarından əl çəkdiyini və savaş strategiyası ilə birlikdə varlığına da son qoyduğunu bildirir.
Video müraciətində Öcalan PKK-nın “kürd inkarına cavab olaraq qurulduğunu” iddia edərək, artıq separatçı gündəmdən əl çəkilməsinin vacib olduğunu deyib. “Kürd kimliyi tanındı və buna görə də bizim əsas məqsədimiz əldə olundu”, – deyə Öcalan qeyd edib.
Bəyanat cümə gününə planlaşdırılan, bir qrup PKK üzvü və terror təşkilatının bir liderinin İraqın Süleymaniyyə şəhərində simvolik olaraq silahlarını yerə qoyması gözlənilən rəsmi mərasimdən əvvəl verilib. Video müraciət həmçinin, bazar ertəsi Türkiyə prezidenti Rəcəb Tayyib Ərdoğanın bir qrup Dem Partiya millət vəkili ilə görüşündən sonra baş tutub.
Tərkisilah ediləcək PKK lideri kimdir?
Yerli medianın yazdığına görə, PKK liderlərindən birinin də qatılacağı ilk tərksilah mərasimində 20-30 PKK silahlısı iştirak edəcək. İlkin məlumatlara görə, kameralar önündə silahını təhvil verəcək PKK lideri ya Duran Kalkan və ya Bese Hozat ola bilər. Bu şəxsin PKK-nın qruplarından biri olan KCK-nın lideri Bese Hozatın olacağına dair daha güclü mesaj mövcuddur.
Bu arada Türkiyə hökuməti də PKK-nın tərksilah prosesinə dəstək sayıla biləcək addımlar atmağa başlayıb. Prezident Ərdoğan iyunun 30-da PKK üzvü Kerim Boranın qalan həbs cəzasını “xroniki xəstəlik və qocalıq” səbəbi ilə əfv edib. Ötən həftə daha bir PKK üzvü, 2015-ci ildə “həll prosesi” zamanı Öcalanın katibliyində çalışmış Çətin Arkas 33 illik həbsdən sonra, “xəstə və yaşlılıq” səbəbindən həbsdən buraxılıb.
Mənbə: Avropa.info
