İsrail mediası bildirir ki, ABŞ prezidenti Donald Tramp iyulun 7-də İsrailin baş naziri Benyamin Netanyahuyla keçirəcəyi görüşdə Qəzza zolağında atəşkəsin elan olunacağını açıqlayacaq.
Avropa.info bildirir ki, İsrailin “Yedioth Ahronoth” qəzetinin İsrailli rəsmilərə istinadla verdiyi xəbərə görə, İsrail HƏMAS-la atəşkəsin detalları üzərində danışıqlar aparmağa hazırlaşır.
İsrailli rəsmilər qeyd edirlər ki, Tramp Netanyahu ilə keçirəcəyi görüşdə Qəzzada atəşkəs və əsir mübadiləsi barədə razılığa gəldiklərini elan etməyi planlaşdırır.
Xəbərdə həmçinin qeyd olunur ki, HƏMAS-ın təklifi qəbul edəcəyi yönündə mesajlar verdiyi bildirilib, razılaşma istiqamətində irəliləyiş əldə olunduğu, lakin azad ediləcək fələstinli məhbuslar və digər məsələlərlə bağlı çətin və mürəkkəb danışıqların aparılacağı vurğulanıb.
İsrail HƏMAS-ın cavabını aldıqdan sonra danışıqlara başlamağa hazırlaşır. Trampın Qətərə, Qətərin isə HƏMAS-a razılaşma üçün təzyiq göstərdiyi iddia olunur.
ABŞ Prezidenti Donald Tramp daha əvvəl bəyan etmişdi ki, İsrail Qəzza zolağında 60 günlük atəşkəsin əldə olunması üçün tələb olunan şərtləri qəbul edib.
Tramp bildirib ki, amerikalı nümayəndələr israilli rəsmilərlə “uzun və məhsuldar” görüş keçirib. “İsrail 60 günlük atəşkəsin yekunlaşdırılması üçün zəruri olan şərtləri qəbul edib. Bu müddət ərzində müharibənin dayandırılması üçün bütün tərəflərlə birgə işləyəcəyik,” – deyə Tramp qeyd edib.
Tramp atəşkəs danışıqlarında vasitəçilik edən Qətər və Misirin HƏMAS-a “son təklif”i təqdim edəcəyini də söyləyib.
HƏMAS isə İsraillə atəşkəs üçün vasitəçilərdən gələn təklifi dəyərləndirdiyini açıqlayıb. Fələstinli mənbələr isə HƏMAS-ın atəşkəs təklifini qəbul etməyə meyilli olduğunu bildiriblər.
