Suriyada 61 illik BƏƏS rejiminin devrilməsi və Bəşər Əsədin ölkədən qaçmasından sonra qurulan Suriya Keçid Hökuməti ölkənin yeni dövlət gerbinin təsdiqləndiyini açıqlayıb.
Avropa.info xəbər verir ki, yeni gerbdə 14 lələkli və 3 ulduzlu şahin yer alıb.
Dəməşqdə Prezident Sarayında təşkil olunan tədbirdə ölkənin yeni dövlət gerbi təqdim edilərək ictimaiyyətə nümayiş etdirilib.
Suriyada bütün dövlət qurumlarına məxsus simvollar, möhürlər, rəsmi sənədlər, şəxsiyyət vəsiqələri və pasportlar yeni dövlət gerbi (milli loqo) ilə əvəz olunacaq.
Yeni loqoda Suriyanın vilayətlərini təmsil edən 14 lələkli qanadlı şahin təsvir olunub. Bundan əlavə, əvvəlki gerbdə qalxanda yerləşən 2 ulduzun sayı 3-ə çatdırılıb.
Əvvəlki milli loqoda yer alan və kənd təsərrüfatı xarakterini simvolizə edən 2 buğda sünbülü isə çıxarılıb.
Digər tərəfdən, yeni milli loqonun təqdimatı ölkə miqyasında coşqu ilə qeyd olunub.
Suriya prezidenti Əhməd Şara milli loqonun təqdimat proqramında çıxış edərək bunları söyləyib:
“Tarixi araşdıran hər kəs Dəməşqin dünya tarixinin başlanğıcı və sonu olduğunu görəcək və devrilmiş rejim dövründə yaşananların Dəməşq tarixindəki ən alçaldıcı dövr olduğunu anlayacaq”.
“Bu gün təqdim etdiyimiz milli loqo parçalanmanı və ayrılığı rədd edən, birləşmiş Suriyanı təcəssüm etdirir,” – deyən Şara yeni milli loqonun hazırlanmasına töhfə verən bütün suriyalılara təşəkkür edib.
