Prezident Ərdoğan və Tramp Hollandiya kralı Willem-Alexander və həyat yoldaşının Haaqada keçirilən NATO Dövlət və Hökumət Başçıları Zirvəsinə qatılan liderlər və onların həyat yoldaşlarının şərəfinə verdiyi nahardan sonra bir araya gəlib.

Görüş Kral Sarayında bağlı qapılar arxasında keçirilib.

Rabitə Müdirliyindən verilən məlumata görə, görüşdə Türkiyə ilə ABŞ arasında ikitərəfli əlaqələr, regional və qlobal məsələlər müzakirə edilib.

Prezident Ərdoğan görüş zamanı iki ölkənin müxtəlif sahələrdə, xüsusilə enerji və investisiya sahələrində böyük potensiala malik olduğunu, başda müdafiə sənayesi olmaqla əməkdaşlığın inkişaf etdirilməsinin 100 milyard dollarlıq ümumi ticarət həcmi hədəfinə nail olunmasını asanlaşdıracağını bildirib.

Ərdoğan İsrail və İran arasında ABŞ prezidenti Trampın səyləri ilə əldə edilən atəşkəs razılaşmasını alqışlayıb, bunun daimi olacağına ümid etdiyini bildirib və Qəzzada baş verən humanitar faciənin bir an əvvəl sona çatması və Rusiya ilə Ukrayna arasındakı müharibənin sülh yolu ilə həlli üçün yaxın dialoqun vacibliyini vurğulayıb.

İki lider NATO-nun aparıcı müttəfiqləri kimi Alyansın çəkindirici gücünü gücləndirmək üçün addımların atılmasının vacibliyini vurğulayıblar.