Cəfər Cabbarlı adına Respublika Gənclər Kitabxanasında Fikrət Qocanın söz sənəti xəzinəsi” adlı material istifadəçilərə təqdim edilib.
Bu barədə Avropa.info-ya Kitabxanadan məlumat verilib.
2025-ci ildə Azərbaycan ədəbiyyatının görkəmli nümayəndəsi, Xalq şairi, Dövlət mükafatı laureatı Fikrət Qocanın anadan olmasının 90 ili tamam olur. Bu münasibətlə Cəfər Cabbarlı adına Respublika Gənclər Kitabxanasında “Fikrət Qocanın söz sənəti xəzinəsi” adlı videomaterial və elektron resurslar bazası hazırlanıb.
Təqdim olunan materialda görkəmli şairin həyat və yaradıcılığı, gənclik illəri, ictimai mövqeyi, mətbu fəaliyyəti, layiq görüldüyü orden, medal və fəxri adlar haqqında geniş məlumat təqdim edilir. Kitabxana əməkdaşları tərəfindən hazırlanan materialda Fikrət Qocanın doğma xalqının azadlıq ideallarının tərənnümü istiqamətində gördüyü işlər, gənc nəslin vətənpərvərlik ruhunda tərbiyəsi işinə verdiyi töhfələr haqqında geniş məlumat verilir. “Fikrət Qocanın söz sənəti xəzinəsi” adlı videomaterialda şairin yaradıcılığında xüsusi yer tutan azadlıq hərəkatı mövzusuna həsr etdiyi “Oddan keçənlər”, “İnsan səviyyəsi”, “Adi həqiqətlər” adlı poemaları, Azərbaycan xalqının qəhrəmanlıq səhifəsi olan 20 Yanvar hadisələri mövzusunda qələmə aldığı “Hələlik qiyamətədək”, “Ölüm ayrılıq deyil” povestlərindən bəhs edilir. Materialda Fikrət Qocanın müxtəlif illərdə yerli və xarici səfərlərdə, görüşlərdə lentə alınan görüntüləri də yer alır.
“Fikrət Qocanın söz sənəti xəzinəsi” adlı videomaterialı kitabxananın rəsmi saytında https://www.ryl.az/multimedia/fikret-qocanin-soz-seneti-xezinesi yerləşdirilib.
Xalq şairi Fikrət Qocanın 90 illiyinin qeyd edilməsi haqqında Azərbaycan Respublikası Prezidentinin Sərəncamından irəli gələn tədbirləri həyata keçirmək məqsədilə Gənclər Kitabxanasının rəsmi saytında https://www.ryl.az/activity/Fikret_Goca “Fikrət Qoca – 90” adlı elektron resurslar bazası yaradılıb. Bazada internet məkanında görkəmli şair haqqında dərc edilən materiallar toplanılır. Bu materiallarda istifadəçilər işlək keçidlər vasitəsilə məqalələrin tam mətninə baxmaq imkanına malikdirlər.
