İyun ayının 18-də Azərbaycan Dövlət Rəssamlıq Akademiyasının tələbəsi, xalçaçı rəssam və müəllim Mehriban Ceyhun qızı Əliyevanın “Hər rəngdən bir dünya” adlı ilk fərdi yaradıcılıq sərgisi keçirildi. Layihənin rəhbəri sənətşünas Aygün Əzizovadır.
Sərgidə müəllifin diplom işi olan, Azərbaycanın Milli Qəhrəmanı, Silahlı Qüvvələrin general-mayoru, şəhid Polad Həşimovun xatirəsinə həsr edilmiş “Xatirələrdə Polad” adlı xalça-portretin təqdimatı da baş tutdu. Ümumilikdə sərgidə rəssamın müxtəlif texnikalarda işlənmiş 25 əsəri nümayiş olunurdu.
Sərgini giriş sözü ilə açan Beynəlxalq Qalereyanın direktoru Elnurə İsgəndərova qeyd etdi:
“Bildiyimiz kimi, Azərbaycan xalq-tətbiqi sənəti, xüsusilə də onun bir qolu olan xalçaçılıq xalqımızın milli mədəniyyəti tarixində özünəməxsus yer tutur.
2010-cu ildə Azərbaycan xalça sənəti UNESCO-nun ‘Bəşəriyyətin qeyri-maddi mədəni irsinin reprezentativ siyahısı’na daxil edildi. Bu, Prezident İlham Əliyevin və Heydər Əliyev Fondunun prezidenti, birinci vitse-prezident Mehriban Əliyevanın milli mədəniyyətimizin təbliğinə göstərdiyi diqqət və qayğının nəticəsidir.
Xalçaçı rəssam M.Əliyeva da bu qədim sənəti yaşadan və onu gələcək nəsillərə ötürən sənətkarlardandır. Onun əsərlərində Azərbaycançılıq ideologiyası, tariximiz, mübarizə ruhu və milli dəyərlər aydın şəkildə əks olunur.
Mehriban xanım xalçaçılığın bütün qaydalarına riayət edərək müxtəlif texnikalarda yüksək estetik zövqlə əsərlər yaradıb.”
Sərgidə fəxri qonaq qismində iştirak edən XeberTime.az portalının rəhbəri Yeganə Telmanqızı, ADRA-nın müəllimləri Zinaida Mirzəzadə və fəlsəfə doktoru Rövşən Hacıyev, eləcə də stomatoloq Nurağa Vəlizadə rəssamın əsərlərinin onlarda dərin təəssürat yaratdığını bildirərək ona gələcək fəaliyyətində uğurlar arzuladılar.
Sonda xalçaçı rəssam M.Əliyeva Beynəlxalq Qalereya tərəfindən ilk fərdi yaradıcılıq sərgisinə görə diplomla təltif olundu və xatirə fotoları çəkildi. Tədbir çay süfrəsi ətrafında davam etdirildi.
Aygün Oqtay,
Fotolar Camalındır
