ABŞ rəhbərliyi İranın müdafiə sənayesi üçün həssas maşınların təchizatı və daşınmasını təmin etdikləri səbəbilə 1 nəfəri və 8 şirkəti sanksiya siyahısına daxil edib.
Avropa.info xəbər verir ki, İsrailin İrana qarşı hücumları ilə başlayan qarşıdurmalar davam edərkən, ABŞ-ın İrana hücum edib-etməyəcəyi ilə bağlı müzakirələr gündəmdədir.
Son günlərdə Ağ Evdən verilən açıqlamada ABŞ prezidenti Donald Trampın iki həftə ərzində İrana hücum edib-etməmək barədə qərar verəcəyi bildirilib. Bu vəziyyət fonunda ABŞ-dan diqqət çəkən bir həmlə edilib.
ABŞ Maliyyə Nazirliyinin yaydığı açıqlamada İranın müdafiə sənayesi üçün həssas avadanlıq təchiz edən qurumların hədəfə alındığı bildirilib.
Açıqlamada qeyd olunub ki, İranın müdafiə sənayesi üçün həssas maşınların təchizatı və daşınmasını təmin etdikləri üçün 1 nəfər və 8 şirkət sanksiya siyahısına daxil edilib.
Açıqlamada, həmçinin Honq-Konq mərkəzli “Unico Shipping” şirkətinə məxsus bir gəminin də sanksiyaya məruz qaldığı qeyd edilib. Bu sanksiyalarla İranın raket və digər silah imkanlarının inkişaf etdirilməsinin qarşısını almaq, həmçinin İran İnqilab Keşikçiləri Korpusu və onun nümayəndə qruplarının maliyyə mənbələrinə çıxışını kəsmək hədəflənib.
ABŞ-ın maliyyə maziri Skott Bessentin bəyanatında bildirilir: “ABŞ İranın rejimi tərəfindən ballistik raketlər, pilotsuz uçuş aparatları və asimmetrik silah proqramlarının əsasını təşkil edən həssas, ikili təyinatlı texnologiya, komponentlər və maşınların təchizini dayandırmaqda qətiyyətlidir”.
Bessent həmçinin bu planlara dəstək verənlərin məsuliyyətə cəlb olunacağını vurğulayaraq, İranın regionun sabitliyinə və qlobal təhlükəsizliyə təhdid yaradan bu ölümcül silahları istehsal və yayma qabiliyyətini azaltmağa davam edəcəklərini qeyd edib.
İyunun 13-də İsrail İranın müxtəlif şəhərlərində yerləşən nüvə obyektləri başda olmaqla, ordunun ali komanda heyətini də hədəfə alan genişmiqyaslı hücumlar həyata keçirib. Hücumlar nəticəsində İran Silahlı Qüvvələrinin Baş Qərargah rəisi, İnqilab Keşikçiləri Korpusunun (SEPAH) komandanı və bir sıra yüksək vəzifəli komandirlər, eləcə də 9 nüvə alimi öldürülüb.
İran Səhiyyə Nazirliyi iyunun 15-də yaydığı açıqlamada İsrailin hücumları nəticəsində ümumilikdə 224 mülki vətəndaşın həyatını itirdiyini, yaralı sayının isə 1277-dən çox olduğunu bildirib. İran ordusunun İsrailə ballistik raketlərlə cavab hücumunda isə 25 nəfər ölüb, 2517 nəfər yaralanıb.
