Avropa.info xəbər verir ki, Peskov paytaxt Moskvada jurnalistlərlə cari məsələləri müzakirə edib.
İsrailin baş naziri Binyamin Netanyahunun “İran lideri Əli Xamneyini hədəfə almaq münaqişəni artırmayacaq, əksinə, sonlandıracaq” açıqlamasını dəyərləndirən Peskov, söz mövzusu açıqlamaları nəzərə aldıqlarını bildirib.
Peskov vəziyyətin təşviş doğurduğunu vurğulayaraq, “Vəziyyət sürətlə gərginləşir. Gözlənilməzlik pik həddə çatıb. Bu vəziyyətdə tərəfləri sülh, siyasi və diplomatik həll yoluna keçmək üçün maksimum təmkinli olmağa çağırırıq”.
İsraillə İran arasında vasitəçilik etməyə hazır olduğunu bildirən Peskov, “Biz görürük ki, İsrail hər hansı vasitəçilik dəstəyinə müraciət etməkdən və ümumiyyətlə, sülh yolu ilə həllə doğru irəliləməkdən çəkinir”.
Peskov bildirib ki, İrandakı Rusiya vətəndaşlarının Azərbaycanla sərhəd qapısından təxliyyəsi istiqamətində işlər davam etdirilir.
“Ukrayna ilə danışıqların yeni raundu ilə bağlı hələlik razılıq əldə olunmayıb”
İyunun 2-də İstanbulda Türkiyənin ev sahibliyi ilə Rusiya ilə Ukrayna arasında aparılan danışıqlarda əldə olunan razılaşmaların həyata keçirilməsi prosesinə toxunan Peskov, “Rusiya tərəfi İstanbulda üzərinə götürdüyü bütün öhdəlikləri yerinə yetirdi” dedi.
Dmitri Peskov Ukrayna ilə danışıqların yeni raundu ilə bağlı hələlik razılığın əldə olunmadığını və bunun ən qısa zamanda müəyyən ediləcəyini bildirib.
“G7 formatı bizim üçün mənasını itirib”
ABŞ prezidenti Donald Trampın “Rusiyanın G8 formatından çıxarılması səhv idi” açıqlamasına gəlincə, mətbuat katibi Peskov bunları qeyd edib:
“Trampın dedikləri ilə razıyıq. G7 ölkələrinin qlobal iqtisadiyyatda payının azalması və bu ölkələrdəki tendensiyaları nəzərə alsaq, G7 formatı bizim üçün mənasını itirib. G7 G20-nin yanında yararsız bir formatdır”.
