Adı açıqlanmayan ABŞ hökumət rəsmilərinin  açıqlamalarına əsaslanan  NYT hesabatında  Ukrayna Təhlükəsizlik Xidmətinin (SBU)  Rusiyadakı müxtəlif hərbi hava limanlarına hücumları müzakirə olunub .

Rəsmilər bildiriblər ki, əməliyyat Rusiyanın strateji imkanlarını sarsıtmaqla yanaşı, həm də göstərdi ki, Ukrayna 600 dollarlıq pilotsuz uçuş aparatlarından (PUA) istifadə etməklə dəyəri 100 milyon dollardan çox olan hərbi təyyarələri məhv edə bilər.

Rəsmilər hücumların Rusiyanı Ukraynadakı əməliyyatlarını azaltmağa vadar etməyəcəyini iddia edərək, Moskvadan “ciddi” cavab gözlədiklərini bildiriblər.

ABŞ-ın Rusiyanın Ukraynaya qarşı hansı əks-hücum edəcəyi ilə bağlı hələ kəşfiyyat məlumatı olmadığını qeyd edən rəsmilər, mülki şəxslərə qarşı İHA hücumlarının həyata keçirilə biləcəyini,  enerji şəbəkələrinin vurula biləcəyini, orta mənzilli ballistik raketlərin buraxıla biləcəyini  irəli sürüblər .

Rəsmilər həmçinin bildiriblər ki, Ukrayna əməliyyatdan əvvəl ABŞ-ı xəbərdar etməyib, çünki onlar “Vaşinqtonun buna qarşı çıxacağını bilirdilər”.

Rusiya: Ukraynanın Rusiya hərbi hava bazalarına hücumu zamanı bəzi təyyarələr yanıb

Rusiya  Müdafiə Nazirliyindən verilən yazılı açıqlamada Ukraynanın Murmansk, İrkutsk, İvanovo, Ryazan və Amur bölgələrindəki hərbi hava bazalarına FPV pilotsuz uçuş aparatları ilə hücumlar təşkil etdiyi, bəzi təyyarələrin alovlandığı bildirilib.

“Bu gün  Kiyev  rejimi Murmansk, İrkutsk, İvanovo, Ryazan və Amur vilayətlərindəki hərbi hava bazalarında FPV PUA-larından istifadə edərək terror aktları həyata keçirib”, – deyə məlumatda bildirilir.

Ukrayna Rusiyanın strateji qanadlı raket daşıyıcılarının 34%-ni vurduğunu iddia edir.

Ukrayna Təhlükəsizlik Xidmətinin (SBU)  Telegram hesabından edilən açıqlamada,  Rusiyanın müxtəlif hərbi hava limanlarına pilotsuz uçuş aparatları (PUA) tərəfindən həyata keçirilən hücumlarda strateji qanadlı raketlər daşıyan  döyüş təyyarələrinin 34 faizinin vurulduğu iddia edilib  .

Açıqlamada SBU-nun “Pavutini” (Hörümçək toru) adlı “xüsusi əməliyyat” təşkil etdiyi vurğulanıb və Rusiyanın strateji aviasiyasına 7 milyard dollar dəyərində ziyan dəydiyi vurğulanıb.