Avropa.info-nun məlumatına görə Qəzza zolağına  amansız və intensiv hücumlarını davam etdirən  İsrail ordusu  məcburi köçkün fələstinliləri, onların məktəblərini, çadırlarını və evləri bombalanan mülki insanları hədəfə alıb.

Xəstəxana  mənbələrindən və hadisə şahidlərindən alınan məlumata görə, İsrail ordusu Qəzza şəhərinin mərkəzindəki Derej məhəlləsində yerləşən və məcburi köçkün fələstinlilərin sığındığı Musa bin Nasir məktəbini iki kamikadze pilotsuz uçuş aparatı (PUA) ilə bombalayıb.

İsrailin hücumu nəticəsində 12 fələstinli ölüb, çoxlu sayda insan yaralanıb.

Qəzza zolağının şimalındakı Cibaliya Qaçqınlar Düşərgəsində İsrail ordusunun hədəf aldığı “Mükayid” ailəsinə məxsus evdə eyni ailədən 9 nəfər həyatını itirib.

İsrail ordusunun Qəzzanın mərkəzindəki Nusayrat Qaçqınlar Düşərgəsində məcburi köçkün fələstinlilərin yerləşdiyi  yanacaqdoldurma məntəqəsini  hədəf alması nəticəsində 15 fələstinli həlak olub və çoxlu sayda insan yaralanıb .

İsrail ordusunun Qəzzanın mərkəzindəki Deyr əl-Bələh şəhərində “Əbu Səmra” ailəsinə məxsus evi bombalaması nəticəsində 13 fələstinli ölüb, bir neçəsi isə yaralanıb.

Qəzza şəhərinin Zeytun məhəlləsində Sikke küçəsində İsrail ordusunun hücumu nəticəsində 1 nəfər həlak olub.

Fələstin Qızıl Aypara Cəmiyyətindən AA-ya verilən məlumata  görə, Qəzzanın cənubundakı Xan Yunus  şəhərinin şərqindəki Menara bölgəsində İsrail ordusunun pilotsuz uçan aparatdan istifadə edərək həyata keçirdiyi hücumda 3 fələstinli həyatını itirib .

İsrail ordusunun artilleriya bölmələri Qəzzanın şimalındakı Beyt Lahiya qəsəbəsində qaçqın düşmüş yüzlərlə fələstinlinin yaşadığı məktəbi bombalayıb, azı 4 fələstinli həlak olub.

İsrail ordusunun Qəzzanın cənubundakı Xan Yunus bölgəsində məcburi köçkün fələstinlilərin məskunlaşdığı çadıra hücumu nəticəsində 4 fələstinli ölüb, 9 nəfər yaralanıb.

İsrail ordusunun Qəzza zolağının mərkəzindəki Deyr əl-Bələh bölgəsində həyata keçirdiyi pilotsuz uçan aparat və hava hücumunda biri uşaq olmaqla 7 fələstinli həlak olub, çoxlu sayda fələstinli yaralanıb.

İsrail ordusuna məxsus pilotsuz təyyarənin Nusayrat Qaçqınlar Düşərgəsindəki qəbiristanlığı əhatə edən ərazini bombalaması nəticəsində bir fələstinli həlak olub.

Qəzza zolağının mərkəzində yerləşən Əl-Bureyc Qaçqınlar Düşərgəsinin cənub-şərqində İsrail ordusunun artilleriya hücumu nəticəsində həyatını itirən iki fələstinlinin cəsədi də həkimlər tərəfindən çıxarılıb.

Qəzza zolağının cənubunda İsrailin Xan Yunisin cənubundakı Kizan ən-Nəccar bölgəsinə hücumu nəticəsində iki fələstinli həlak olub.

Xan Yunisin şərqində və şəhərin cənubunda yerləşən Abesan əl-Kəbirə qəsəbəsinə İsrailin pilotsuz təyyarələrinin hücumları nəticəsində iki fələstinli həlak olub.

Digər tərəfdən daha əvvəl şəhər mərkəzindəki evinin bombalanması nəticəsində yaralanan Əl-Beyuk ailəsindən bir fələstinli həyatını itirib.

İsrailin Qəzzanın Şucayyə məhəlləsində bir evi hədəfə aldığı hücumda Həsəneyn ailəsindən iki fələstinli şəhid olub, çoxlu sayda insan yaralanıb.