Cəfər Cabbarlı Respublika Gənclər Kitabxanasında Xalq şairi Bəxtiyar Vahabzadənin 100 illlik yubileyi çərçivəsində hazırlanması nəzərdə tutulan materiallar istifadəçilərə təqdim edilir.
Avropa.info xəbər verir ki, 2025-ci ildə Azərbaycan ədəbiyyatının görkəmli nümayəndəsi, Xalq şairi, dramaturq, ədəbiyyatşünas, pedaqoq və ictimai xadim, SSRİ və Azərbaycan Respublikasının Dövlət mükafatları laureatı, akademik Bəxtiyar Vahabzadənin anadan olmasının 100 ili tamam olur. Azərbaycan Respublikasının Prezidenti İlham Əliyevin Xalq yazıçısı Bəxtiyar Vahabzadənin 100 illik yubileyinin keçirilməsinə dair imzaladığı Sərəncamdan irəli gələn tədbirləri həyata keçirmək məqsədilə Cəfər Cabbarlı adına Respublika Gənclər Kitabxanasında “Mən ilk qaynağımdan türk oğlu türkəm” adlı metodiki vəsait hazırlanıb.
Təqdim olunan bu vəsaitdə Xalq şairi Bəxtiyar Vahabzadənin 100 illik yubileyinin qeyd edilməsi haqqında Azərbaycan Respublikası Prezidentinin Sərəncamının, akademik İsa Həbibbəylinin müəllifi olduğu “Milli istiqlal şairi Bəxtiyar Vahabzadə” adlı məqalənin tam mətni, elm, mədəniyyət, ədəbiyyat, mətbuat sahəsinin nümayəndələrinin, ictimai-siyasi xadimlərin onun haqqında söylədikləri dəyərli fikirlər yer alır. “Bəxtiyar Vahabzadə irsinin kitabxanalarda təbliği” başlığı altında kitabxanalarda Xalq şairinin yubileyi çərçivəsində nəzərdə tutulan elektron məlumat bazasının, virtual və ənənəvi kitab sərgilərinin, təbliğat xarakterli materialların hazırlanması, kitab təqdimatı, ədəbi-bədii tədbirlərin, viktorinaların, müsabiqələrin keçirilməsi metodikası sahəsində tövsiyələr təqdim edilir. Kitabxana əməkdaşları tərəfindən hazırlanan metodiki vəsaitdə görkəmli şairin xatirəsinin əbədiləşdirilməsi haqqında məlumatlar da yer alır. Ümumilikdə vəsait kitabxana işçiləri, BDU-nin İnformasiya və sənəd menecmenti fakültəsinin tələbələri, kütləvi tədbir keçirən təşkilatların əməkdaşları üçün nəzərdə tutulub.
“Mən ilk qaynağımdan türk oğlu türkəm” adlı metodiki vəsait kitabxananın rəsmi saytında https://www.ryl.az/funds/metodiki-vesaitler yerləşdirilib
