Beynəlxalq Qalereya və Azərbaycanda Kazak Həmyerliləri Cəmiyyətinin birgə təşkilatçılığı ilə 9 May – Faşizm üzərində Qələbə Günü münasibətilə tədbir və mövzuya uyğun sərgi təşkil edilib.
Avropa.info xəbər verir ki, tədbirdə tarixi qələbənin əhəmiyyəti, müharibə illərində xalqların həmrəyliyi və müasir dövrdə sülhün qorunması mövzuları ön plana çəkilib.
Beynəlxalq Qalereyanın direktoru Elnurə İsgəndərova açılış nitqində bildirib:
“Bu tədbir yalnız tarixi yaddaşın canlandırılması deyil, həm də müxtəlif xalqların sülh uğrunda birgə mübarizəsinin simvoludur. Sərgidəki hər bir əsər insanlıq tarixinin bu parlaq səhifəsini əks etdirir.”
Azərbaycanda Kazak Həmyerliləri Cəmiyyətinin sədr müavini Ruslan Steptsov isə qeyd edib:
“Azərbaycan və kazak xalqları həmişə sülh və ədalət uğrunda birgə dayanıb. Bu tədbir də bizim üçün həmrəylik və dostluq dəyərlərini bir daha təsdiqləyir.”
Tədbirdə, həmçinin Azərbaycan kazak icmasının texniki şöbəsinin rəisi Rauf Mehdiyev və Kazak Həmyerliləri Cəmiyyətinin əməkdaşı Yevgeniya Demkina mədəniyyətin tarixi yaddaşın qorunmasındakı rolunu vurğulayan çıxışlar ediblər.
Tədbir çərçivəsində 20 rəssamın Faşizm üzərində Qələbə mövzusuna həsr olunmuş əsərləri nümayiş etdirilib. Rəssamlar tədbirin sonunda fəxri fərmanlarla təltif olunublar.
Beynəlxalq Qalereyanın direktoru Elnurə İsgəndərova və layihə rəhbəri Aygün Əzizova mədəniyyət və incəsənət sahəsindəki xidmətlərinə görə ordenlərlə təltif olunublar.
Tədbir müasirlik və tarixiliyi birləşdirən xatirə fotoçəkilişi ilə başa çatıb.
Aygün Oqtay,
Fotolar Ayazındır
