F.Köçərli adına Respublika Uşaq Kitabxanasında “Sağlamlıq körpəlikdən başlayır” adlı maarifləndirici təlim keçirilib.
Avropa.info xəbər verir ki, 5 may 2025-ci il tarixində F.Köçərli adına Respublika Uşaq Kitabxanasında oxu və yazı vərdişlərində çətinlikləri olan uşaqlara dəstək olmaq, onlarda özünə inamı artırmaq və sosial inkişafını təmin etmək məqsədilə “Sağlamlıq körpəlikdən başlayır” adlı layihənin davamı olaraq növbəti maarifləndirici təlim keçirilib. Təlimdə psixopedaqoq Bülül Quliyeva, 177 nömrəli tam orta məktəbin psixoloqları və kitabxana əməkdaşları iştirak edib.
Maarifləndirici təlimin bu dəfəki mövzusu “Məktəb dövründə yaranan öyrənmə çətinliyi” olub. Psixopedaqoq Bülül Quliyeva öyrənmə çətinliyinin diaqnoz və aşkar olunması, müalicə və müdaxilə yolları haqqında danışıb, bu dövr ərzində valideyn dəstəyinin əhəmiyyətini vurğulayıb. Həmçinin qeyd edib ki, öyrənmə çətinliyi ömür boyu davam etsədə müalicə və müdaxilə ilə yaxşılaşa bilər. Müalicə və müdaxilə öyrənmə çətinliyində ən effektiv üsullardan biridir. Xüsusi təhsil proqramı, loqoped terapiyası (xüsusən disleksiya və disqrafiyada), psixoloji və texnoloji dəstək bu problemi maksimum səviyyədə korreksiya edir.
Təlimdə bu qrupa aid olan uşaqlar üçün individual yanaşmanın və müntəzəm məşqlərin rolu da geniş müzakirə edilib.
Təlimin sonunda iştirakçıların sualları cavablandırılıb, uşaqların inkişafına necə dəstək olmağı, onların emosional və sosial ehtiyaclarını necə qarşılamaları barədə praktiki məsləhətlər verilib.
