İsrail ordusunun gecə saatlarından etibarən Qəzza zolağının müxtəlif bölgələrində həyata keçirdiyi genişmiqyaslı hücumlarda 20 fələstinli həyatını itirib.
Avropa.info Fələstinin WAFA xəbər agentliyinə istinadən xəbər verir ki, İsrail döyüş təyyarələri Qəzza şəhərinin şimal-qərbindəki Əl-Kərəmə bölgəsi yaxınlığındakı “Rumuz” yaşayış binasında bir neçə mənzili bombalayıb .
İsrailin hücumu nəticəsində 15 fələstinli həyatını itirib, 10-u yaralanıb.
İsrail ordusunun Qəzza zolağının şimalında Beyt Lahiyənin qərbindəki Əl-Salatin məhəlləsində “Əl-Əttar” ailəsinə məxsus evi bombalaması nəticəsində 4 nəfər ölüb, 5 nəfər yaralanıb.
İsrail ordusuna məxsus pilotsuz uçuş aparatının Qəzzanın şimalındakı Cibaliya qəsəbəsində bir qrup fələstinlini hədəf alması nəticəsində 1 nəfər ölüb, bir neçə nəfər yaralanıb.
Bundan əlavə, İsrail ordusu Qəzza zolağının cənubundakı Qəzza şəhəri və Rəfah şəhərində çoxsaylı evləri və mülki binaları partladıb.
İsrail ordusu yenidən hücumlara başladıqdan sonra əksəriyyəti qoca, qadın və uşaq olmaqla 2436 fələstinli həyatını itirib, 6450 nəfər isə yaralanıb.
2023-cü il oktyabrın 7-dən etibarən İsrailin Qəzza zolağına təşkil etdiyi hücumlarda həyatını itirən fələstinlilərin sayı 52 min 535-ə, yaralıların sayı isə 118 min 491-ə yüksəlib.
