“Türk Dünyası” rəsm qalereyasında 70-ə qədər əsər nümayiş etdirilir”.
Bunu Avropa.info-ya açıqlamasında Xalq rəssamı, professor Sakit Məmmədov
Zirə Mədəniyyət Mərkəzində baş tutan “Türk Dünyası” adlı rəsm qalereyasının açılış mərasimində deyib.
“Zirə Mədəniyyət Mərkəzində “Türk Dünyası” rəsm qalereyasını açmışıq və bu çox gözəl ənənədir.
Keçən il sərgiyə türk dünyasının böyük rəssamlarını dəvət etmişdim. Burada rəssamlar əsərlər yaratdılar, biz simpozium keçirdik. Həmin əsərlər rəsm qalereyasında nümayiş edilir.
Mən sərgiyə Azərbaycan rəssamlarını da dəvət etdim və burada tanınmış rəssamlarımızın da əsərləri nümayiş edilir. Çox sevirəm ki, belə bir məkanda Avropa standarlarından da artıq səviyyədə qalereya yaradılıb.
Hər 10-20 gündən bir sərgidə müxtəlif əsərlər nümayiş ediləcək. Burada bayramlarımızla bağlı fərdi sərgilərimiz də baş tutacaq. Rəssam azad olmalıdır və istədiyi əsəri nümayiş etdirə bilməlidir. Bu mədəniyyətimizin təbliğidir və kimin daxilindən, qəlbindən nə gəlirsə, kətana köçürür. Biz də rəsm əsərini qəbul edirik. Hətta burada 100-dən artıq əsər nümayiş etdirmək olar. Hətta Zirə Mədəniyyət Mərkəzində heykəltəraşların da simpoziumunu təşkil etmək istəyirik. Təbii ki, hər şeyi yüksək səviyyədə təşkil edəcəyik”, – deyə S.Məmmədov deyib.
Qeyd edək ki, tanınmış rəssam Sakit Məmmədov UNESKO Rəssamlar İttifaqının üzvü, Avropa Təbii Elmlər Akademiyasının həqiqi üzvü, Vatikan Heraldika Akademiyasının qrafı, bundan əlavə, Dünya İncəsənət Akademiyasının və “Türk Dünyası” Akademiyasının həqiqi üzvüdür.
Aygün Oqtay
Fotolar Camalındır
