Ədalət Partiyasının qurultaya hazırlıq üzrə Təşkilat Komitəsinin sədri Mütəllim Rəhimli mətbuat konfransı keçirib.
Avropa.info xəbər verir ki, partiyanın Təşkilat Komitəsinin sədri mətbuat konfransında partiya daxilində yaranmış mövcud vəziyyətə və ictimaiyyətdə yaranan bəzi suallara aydınlıq gətirib. Mütəllim Rəhimli bildirib ki, son dövrlər partiya daxilində pozucu fəaliyyət göstərən bəzi qüvvələr ümumi işin gedişatına mənfi təsir göstərir və cəmiyyətdə çaşqınlıq yaratmağa çalışırlar.
O, çıxışında Ədalət Partiyasının mərhum sədri İlyas İsmayılovun siyasi irsinə də toxunub:
“Ədalət Partiyasının sabiq sədri rəhmətlik İlyas İsmayılov ədalətli bir insan olub, onun qapısı həmişə hamının üzünə açıq olub. Bu gün İlyas İsmayılovun qurduğu, yaratdığı partiyaya, habelə onun kürsüsünə məcburi şəkildə oturmaq istəyənlər onu avtoritar münasibətdə günahlandırırlar. Belə pozucu və iddialı qüvvələr partiya daxilində ümumi münasibətləri pozmağa, nifaq salmaga xidmət edir”.
Mütəllim Rəhimli həmçinin partiya üzvlərinə səbrli və təmkinli olmağı tövsiyə edib:
“Bir partiyada birləşdiyimiz məsləkdaşlarıma partiya daxilində baş verən bu neqativ hadisələrə qarşı tolerant olmağı tövsiyə edirəm. Hər halda biz bir partiyanın üzvü olmuşuq, isti münasibətlərimiz olub”.
Konfransda partiyanın Ali Məclisi ilə bağlı da ətraflı məlumat verilib. M. Rəhimli bildirib ki, hazırda Ali Məclisin 65 üzvü var. Bunlardan 56 nəfəri ölkənin müxtəlif rayon təşkilatları tərəfindən seçilmiş nümayəndələrdir, 9 nəfər isə partiyanın 8-ci qurultayında birbaşa seçilib.
“Ali Məclisin aprelin 19-da keçirilən iclasında 56 üzv iştirak edib. Bu iclasın da videomaterialı və protokolu əlimizdədir. Yəni, Ali Məclisin iclasının guya yetərsay olmadan, qanunsuz keçirildiyi barədə kimsə artıq-əskik danışa bilməz”, – deyə o əlavə edib.
Təşkilat Komitəsinin sədri qeyd edib ki, Meydan Babayev Ali Məclisin iclasının qarşısını almaq üçün gecə partiyanın ofisinin qapısını dəyişdi və partiya üzvlərinin oraya daxil olmasına imkan verməyib:
“Mən buna çox təəssüf edirəm. Ali Məclisin sədri Ali Məclis üzvlərinin üzünə qapını bağladı. Bu, hansı qanuna və etikaya sığır?! İnsanlar orada emosional vəziyyətə çatmışdılar. Onları güclə sakitləşdirdim və iclasımızı keçirdik. Biz partiyanın qapısının bağlanması faktı ilə bağlı polisə müraciət etdik. Polis hadisəni araşdırmaqdadır. Qeyri-qanuni hərəkət mütləq özünün adekvat qanuni cəzasını alacaq”.
O bildirib ki, partiya daxilində pozucu fəaliyyət yürüdən 7 nəfərdən ibarət bir qrup ölkə mediasına onu partiyanın sıralarından çıxardıqlarını bəyan ediblər. M.Rəhimli qeyd edib ki, bu, qeyri-qanuni qərardır.
M. Rəhimli söyləyib ki, aprelin 19-da Ali Məclisin iclasını keçirib, mayın 17-də partiyanın növbəti qurultayının çağırılması barədə qərar veriblər.
M.Rəhimli bildirib ki, Ədalət Partiyasının mərkəzində baş verən hadisələr partiya üzvləri arasında narahatlıqla qarşılanır:
“Bir çox üzvlərimiz öz mövqelərini açıqlayıblar. Təəssüf ki, əks tərəf yalan informasiyaları dövriyyəyə buraxır və cəmiyyəti aldatmaqla məşğuldur”.
Mətbuat konfransı partiya daxilindəki gərginliklərə və onların aradan qaldırılmasına yönəlmiş mesajlarla yekunlaşıb.
Avropa.info
