Keçən ay Qəzzada 15 yardım işçisinin qətlə yetirilməsindən sonra İsrail etirafa bərabər bir açıqlama verdi. Hadisə ilə bağlı aparılan araşdırmada ordunun səhvlərə yol verdiyi etiraf edilib. Bununla belə, “pis niyyət və ya niyyətin olmadığı” iddia edilib və hadisəyə görə məsuliyyət daşıyan əsgərlərin məhkəməsi əngəllənib.
İsrail ordusu səkkiz ilk yardım işçisi, altı mülki müdafiə işçisi və Birləşmiş Millətlər Təşkilatının (BMT) Fələstinli Qaçqınlara Yardım Agentliyinin (UNRWA) bir işçisi də daxil olmaqla 15 nəfərin öldürülməsi ilə bağlı araşdırmanın nəticələrini açıqlayıb .
Ordunun səhv və xətalara yol verdiyini etiraf edən istintaq “zərərli fəaliyyət” və ya “qəsdən edam” olmadığını müdafiə edib.
İsrail Baş Qərargah rəisi Eyal Zamir bildirib ki, hücum yalnız “bir neçə peşəkar uğursuzluq, əmrlərin pozulması və insident barədə tam məlumat verilməməsi” ilə əlaqədardır.
Ortaya çıxan görüntülər və dəlillər 15 fələstinli xilasedicinin yaxın məsafədən edam edildiyini, güllə yaralarının isə yaxın məsafədən baş və bədən nahiyəsinə hədəflənmiş güllələrdən olduğunu göstərsə də, tibb işçilərini öldürən əsgərlər haqqında “qəsdən edam edilmədiyi” səbəbiylə cinayət araşdırması və ya mühakimə olunmayacağı bildirildi.
İstintaq müəyyən edib ki, İsrail əsgərləri əmrləri pozaraq BMT-nin avtomobilinə və HƏMAS-ın maşınları ilə səhv saldıqları təcili yardım maşınlarına atəş açıblar.
İsrailin dövlət televiziya kanalı KAN xəbər verib ki, Baş Qərargah rəisi Zamir böyük beynəlxalq rezonansa səbəb olan hadisənin “qəsdən” törədilməsinə baxmayaraq, hücum əmrini verən batalyon komandirinin müavinini vəzifəsindən azad edib.
Edamın görüntüləri ortaya çıxıb
İsrail ordusunun Qəzza zolağının cənubundakı Rəfah şəhərinə hücumu nəticəsində yaralananlara kömək etmək üçün bölgəyə gedən 15 səhiyyə və mülki müdafiə işçisinin cənazələri kütləvi məzarlıqdan çıxarılıb.
Martın 23-də Rəfahda baş verən hadisənin görüntülərində İsrail əsgərlərinin səhiyyə və mülki müdafiə qruplarına atəş açması göstərildikdən sonra İsrail ordusu təcili yardım və yanğınsöndürən maşını hədəf aldığını etiraf etmək məcburiyyətində qalıb .
Görüntülərdə fənərləri sönmüş və qəza işıqları yandırılmış təcili yardım maşınları görünsə də, İsrail ordusu avtomobillərin “farları sönmüş və fövqəladə vəziyyət siqnalları olmadan şübhəli şəkildə hərəkət etdiyini” iddia edib.
Qəzzada Fələstin Səhiyyə Nazirliyindən verilən açıqlamada, Rəfahda hədəf alınan və cansız bədənləri tapılan bəzi şəxslərin əllərinin bağlandığı, başlarının və sinələrinin güllələndiyi, dərin bir çuxura basdırıldığı bildirilib.
Bu hadisə beynəlxalq mətbuatda hiddətə səbəb olub.
