Ədalət Partiyasının qurultayı nizamnaməyə uyğun olaraq 4 ildən bir keçirilməlidir. Sonuncu qurultay 2021-ci ilin martın 14-də keçirilib. Növbəti qurultay 2025-ci ilin martın 14-ə qədər keçirilməli idi. Sədri İlyas İsmayılovun fevralın 17-də vəfatı ilə əlaqədar qurultayı keçirmək mümkün olmadı.
Avropa.info xəbər verir ki, bunu Teleqraf-a açıqlamasında Ədalət Partiyanın sədr müavini Mütəllim Rəhimli deyib.
O qeyd edib ki, “Siyasi partiyalar haqqında” Qanuna uyğun olaraq partiyanın qurultayı keçirilib, müvafiq sənədlər Ədliyyə Nazirliyinə təqdim olunur: “İlyas bəyin 40 mərasimindən sonra partiyanın qurultayının keçirilməsi ilə bağlı qərar verilmişdi. Martın 31-də İlyas bəyin 40 mərasimi bitdi. Amma hazırda sədrin səlahiyyətlərini icra edən Ali Məclisin sədri Meydan Babayev qurultayla bağlı prosedurlara başlamağın əleyhinədir”.
Sədr müavini hazırda sədrlik uğurunda 4 nəfərin mübarizə apardığını bildirib: “Meydan Babayev, Vüsalə Dadaşova, Elçin Qurbanov və Mütəllim Rəhimli sədrlik uğrunda yarışa başlayıb. Elxan Şükürlü isə sosial media hesabında bu mübarizədən çəkildiyini elan edib. Sədrin seçilməsi üçün qurultay çağırılmalıdır. Meydan Babayev isə siyasi şuranın aprelin 12-də keçirilən iclasında iştirak etmədiyinə görə onun qərarını tanımaq istəmir. Sabah, yəni aprelin 19-da ali məclisin iclası keçiriləcək və burada qurultayın vaxtı müəyyənləşəcək. Siyasi şuranın 11 üzvündən 7-si iştirak edərək ali məclisin keçirilməsi ilə bağlı qərara səs verib. Eyni zamanda partiyanın nəzarət təftiş komissiyası bunun nizamnaməyə uyğunluğunu təsdiq edib. Partiyada MNTK-dan üstün mövqe yoxdur. Ona görə də Meydan bəyin iddiaları əsassızdır. O, mənim sədr olmağımı, qurultayın keçirilməsini istəməsə də, elə şeylər var ki, onlarla razılaşmaq lazımdır. İddia odur ki, sədri öz aramızda seçib, sonra qurultaya gedək. Belə olan halda biz qurultayda kimi seçəcəyik sualı açıq qalır. Vahid namizədi seçib, qurultaya getmək oyundan başqa bir şey deyil və partiya üzvlərinə hörmətsizlikdir”.
Qeyd edək ki, İlyas İsmayılov fevralın 17-də müalicə aldığı Mərkəzi Klinik Xəstəxananın reanimasiya şöbəsində dünyasını dəyişib.
O, 1938-ci il martın 20-də Tovuz rayonunda anadan olub. 1985-1990-cı illərdə Respublika prokuroru, 1992-1995-ci illərdə isə ədliyyə naziri kimi fəaliyyət göstərib. Milli Məclisin III və IV çağırış deputatı olub. 2001-ci ildən isə Ədalət Partiyasına sədrlik edib
