Urmiyada baş verən aksiyalar Güney Azərbaycanda yaşayan çoxmilyonlu türklərin İran rejiminin assimilyasiya və diskriminasiya siyasətinə etirazının növbəti dalğasıdır.
Bunu Avropa.info-ya açıqlamasında politoloq Qulamhüseyn Əlibəyli deyib.
Onun sözlərinə görə, İran rejiminin, bir tərəfdən, Urmiya gölünün quruması prosesinin qarşısını almaq üçün heç bir tədbir görmək istəməməsi, digər tərəfdən isə, həmin bölgəyə Suriya və digər ərazilərdən kürdlərin köçürülməsi bu etirazları doğuran səbəblər sırasındadır.
“Ümumiyyətlə, İran ərazisində kompakt şəkildə yaşayan Azərbaycan türklərini parçalayaraq farslar, ermənilər, kürdlər və digər etniklər arasında əritmək, onların arasına digər etnikləri yerləşdirməklə və bir-biri ilə canlı əlaqələri qırmaqla assimilyasiya etmək iran rejiminin siyasətinin başlıca istiqamətlərdən biridir. Məlumdur ki, Türkiyə ilə həmsərhəd olan Urmiya bölgəsinin Türkiyə ilə sıx əlaqəsi var. İran rejimi mövcud əlaqələrin davam etməsi və genişlənməsini öz maraqlarına zidd hesab edir”, – deyə o əlavə edib.
Q.Əlibəyli vurğulayıb ki, buna görə də həmin bölgəyə Suriya və digər ərazilərdən kürdlərin köçürülərək Türkiyə ilə sərhəd boyunda yerləşdirilməsi Urmiyanın və bütövlükdə İranda yaşayan türklərin Türkiyə ilə əlaqələrinin kəsilməsinə, ümumiyyətlə, Türk dünyasının həm İrandakı türklərlə, həm Güney Qafqaz, həm də Mərkəzi Asiyada yaşayan türklərlə əlaqələrinin kəsilməsinə nail olmaq istəyir:
“Bu prosesi dayandırmaq üçün Azərbaycan dövləti ehtiyatla, onsuz da İran rejimi tərəfdən vaxtaşırı gərginləşdirilən dövlətlərarası münasibətlərə xələl gətirmədən İranda yaşayan soydaşlarımıza mənəvi dayaq olmaq üçün müəyyən tədbirlər görə bilər, ictimai və siyasi təşkilatlar, insan hüquqlarını müdafiə qurumları, ziyalılar, media daim diqqətdə saxlamaqla dəstək göstərə bilərlər”.
Avropa.info
