Macarıstan hesab edir ki, Ukrayna NATO-nun üzvü olmayacaq, yenidən Rusiya ilə Şimali Atlantika Alyansı arasında bufer zonaya çevriləcək. Bunu Macarıstanın baş naziri Viktor Orban Budapeştdə ötən ilin siyasi yekunları və hökumətinin qarşıdakı dövr üçün prioritetləri ilə bağlı proqram xarakterli çıxışı ilə deyib.
Qonşu ölkədəki münaqişəyə toxunaraq, o, “əslində müharibə Ukrayna ilə bağlı deyil, NATO ilə Rusiya arasında münaqişə zonası olan və hazırda NATO-nun nəzarətində olan “Ukrayna” adlı ərazidən gedir” fikrini ifadə edib. “Niyə avropalı və amerikalı liberalların rusların kənarda durub buna baxacağını düşündükləri sirr olaraq qalır. Onların cəhdinin uğursuzluğa düçar olduğu artıq bəllidir. Ukrayna və ondan qalanlar yenidən bufer zonaya çevriləcək. Ukrayna NATO-nun üzvü olmayacaq”, – Orban bildirib.
Ona görə də baş nazir hesab edir ki, indi əsas məsələ hətta münaqişənin özü deyil, bitdikdən sonra nə baş verəcəyidir. Bu baxımdan Macarıstanın ABŞ prezidentliyinə qayıdan Donald Trampa böyük ümidlər bəslədiyini təsdiqləyən “Müharibə bitmək üzrədir” deyib.
Bundan əvvəl Macarıstan hökuməti Səudiyyə Ərəbistanında keçirilən Rusiya-Amerika danışıqlarını dəstəkləyib və onların Ukraynada hərbi əməliyyatların dayandırılmasına gətirib çıxaracağına ümid etdiyini bildirib. Budapeşt Ukrayna münaqişəsinin lap əvvəlindən onun sülh yolu ilə həllinə çağırıb və Kiyevə silah verməkdən imtina edib. Bu mövqe Macarıstanla ABŞ-ın əvvəlki administrasiyası və Avropa İttifaqının rəhbərliyi arasında kəskin fikir ayrılıqlarına səbəb olub.
Avropa.info
