Avropa.info-nun məlumatins görə Kataniya Beynəlxalq Vincenzo Bellini Hava Limanını idarə edən şirkət SAC tərəfindən bu səhər verilən açıqlamada, Etnada davam edən püskürmə fəaliyyəti və eyni vaxtda atmosferə vulkanik kül emissiyası səbəbiylə vulkanın cənub-qərbindəki hava məkanının yerli vaxtla saat 15:00-a qədər uçuşlara bağlandığı bildirilib.

Açıqlamada qeyd olunub ki, hazırda Kataniya Hava Limanından uçan reyslər üçün heç bir məhdudiyyət yoxdur, lakin sərnişinlərdən uçuşların vəziyyətini yoxlamadan hava limanına gəlməmələri xahiş olunur.

İtaliyanın Rainews24 kanalı, xüsusilə Etna vulkanında bir həftədən çox davam edən intensiv vulkanik fəaliyyətlər səbəbiylə dünən hava nəqliyyatının mənfi təsirləndiyini bildirdi.

Son 24 saatda Kataniya Hava Limanından 32 uçuşun başqa hava limanlarına yönləndirildiyi, Lufthansa və Easyjet kimi hava yollarının da Kataniyaya uçuşlarının bir qismini ləğv etdiyi bildirilib.

Bu arada Etnanın püskürdüyü sıx kül səbəbindən vulkanın ətrafındakı yaşayış məntəqələrində vulkanik kül yağışlarının yaşandığı qeyd edilib.

Son 8 gün ərzində Etna dağının müxtəlif nöqtələrində lava axını, “Yeni Ağız” və “Cənub-Şərq” kraterlərində kül və lava atılması kimi müxtəlif vulkanik fəaliyyətlər müşahidə olunub.

Kontinental Avropanın ən yüksək aktiv vulkanı olan Siciliya adasındakı Etna vulkanı sonuncu dəfə 2024-cü ilin yayında şiddətli kül və lava püskürmələri kimi vulkanik fəaliyyət gördü.