Avropa.info- ya kitabxanadan verilən məlumata görə bu il tanınmış yazıçı-publisist, jurnalist, ssenarist İntiqam Mehdizadənin 80 yaşı tamam olur. Bu münasibətlə Cəfər Cabbarlı adına Respublika Gənclər Kitabxanasında yazıçının həyat və yaradıcılığına həsr edilmiş virtual kitab sərgisi və vəsait hazırlanıb.
Kitabxananın rəsmi saytında yerləşdirilən https://ryl.az/funds/daycest vəsaitdə İntiqam Mehdizadənin yazıçı-publisist, jurnalist kimi özünəməxsus yaradıcılıq keyfiyyətləri təsvir edilir, həyat və yaradıcılığından bəhs edən “El istəkli, Vətən istəkli İntiqam Mehdizadə” adlı məqalənin tam mətni təqdim edilir. Bundan əlavə vəsaitdə İntiqam Mehdizadənin müxtəlif qəzet və jurnallarda çap edilən “Vahidimiz Əzizimiz”, “Rənglər, yaxud yaddaşlardan silinməyən Səməd Mənsur hikmətləri”, “Xocalı gəzişmələri”, “Səs yadigarı”, “Fəlsəfə və biz – “Bu gün dünəndən başlayır”” kimi 30-a yaxın məqaləsinin biblioqrafik təsviri, qısa annotasiyası və elektron keçidi yer alır. Vəsaitdə məqalələr illər üzrə, daxildə isə əlifba ardıcıllığı ilə verilir.
Virtual kitab sərgisində İntiqam Mehdizadənin yaradıcılıq nümunələri ilə yanaşı, Nizami Gəncəvi adına Milli Azərbaycan Ədəbiyyatı Muzeyinin direktoru, filologiya elmləri doktoru, professor, AMEA-nın həqiqi üzvü, Azərbaycan Respublikası Milli Məclisi sədrinin müavini Rəfael Hüseynovun yazıçı haqqında söylədiyi dəyərli fikirlər, yubilyarın öz səs yazıları da təqdim edilir. Kitabxana əməkdaşları tərəfindən hazırlanan virtual sərgidə İntiqam Mehdizadənin “İşığa çıxmış düşüncələr”, “Maralı qoca dağlar”, “Ömür belə keçir” kimi kitabların qısa annotasiyası sərgilənir.
Yazıçı İntiqam Mehdizadənin 80 illik yubileyi ilə əlaqədar hazırlanan virtual kitab sərgisi kitabxananın rəsmi saytında https://ryl.az/multimedia/intiqam-mehhdizade-80 yerləşdirilib
