“Son illərdə sosial media marketinqliyinə (SMM) maraq sürətlə artıb”.
Avropa.info xəbər verir ki, bu sözləri “Zahidə Səməd Akademiya”nın təsisçisi, SMM mütəxəssisi Zahidə Səməd “Cebheinfo.az”a açıqlamasında deyib.
O bildirib ki, xüsusilə koronavirus pandemiyası dövründən sonra bizneslər və fərdi brendlər sosial medianın gücünü daha yaxşı dərk etdilər:
Zahidə Səməd
“Artıq ən kiçik biznesdən tutmuş iri şirkətlərə qədər hər kəs sosial mediada aktiv olmağa çalışır. Ənənəvi marketinq kanalları ilə müqayisədə SMM həm daha sərfəli, həm də ölçüləbilən nəticələr verir. Buna görə də daha çox üstünlük qazanır. İnsanlar təkcə satış üçün deyil, həm də şəxsi brendlərini inkişaf etdirmək, ekspert kimi tanınmaq və daha geniş auditoriyaya çatmaq üçün sosial medianı aktiv şəkildə istifadə edirlər”.
Mütəxəssis qeyd edib ki, bütün sahələr sosial media marketinqinə ehtiyac duyur:
“Ancaq xüsusilə pərakəndə satış, gözəllik və estetik xidmətlər, səhiyyə və tibbi sahələr, təhsil, kurslar, eləcə də restoran və qida sektoru SMM-dən daha çox faydalanır. Son illərdə fərdi brendlər – psixoloqlar, həkimlər, biznes məsləhətçiləri və təlimçilər də SMM-ə ciddi sərmayə qoyurlar. Çünki sosial media onlar üçün həm etibarlılıq yaratmaq, həm də müştəri qazanmaq üçün ən güclü vasitəyə çevrilib”.
Zahidə Səməd diqqətə çatdırıb ki, SMM mütəxəssisinin səhifənin inkişafına və satışlara təsiri olduqca böyükdür:
“Amma bu təsirin nə qədər olduğunu konkret şəkildə söyləmək çətindir. Çünki bu, bir çox amillərdən asılıdır. Yəni məhsulun keyfiyyəti, hədəf auditoriya, reklam büdcəsi, kontentin keyfiyyəti və s. məsələləri bura aid etmək olar. Lakin buna baxmayaraq, düzgün SMM strategiyası ilə satışları 50-100 faiz, hətta daha çox artırmaq mümkündür. Xüsusilə brendin sosial mediada peşəkar şəkildə təqdim olunması, effektiv reklam kampaniyaları və düzgün kontent planı satışlara birbaşa təsir edir.
Bir çox bizneslərdə SMM-ə keçiddən sonra gəlirin iki-üç dəfə artdığını görmüşük. Nəzərə almaq lazımdır ki, SMM təkcə post paylaşmaqdan ibarət deyil, bu, bir strategiyadır. Düzgün strategiya ilə isə istənilən biznesi daha geniş auditoriyaya çatdırmaq və satışları yüksəltmək mümkündür”.
