ABŞ prezidenti Donald Tramp vəzifəsinin icrasına başladıqdan sonra 24 saat ərzində Rusiya-Ukrayna münaqişəsinə son qoymaq vədini şərh edib.
Avropa .info xəbər verir ki, yeni Prezident Ağ Evdə jurnalistlərə açıqlamasında bu barədə danışıb.
“Yarım gün keçdi. Məndə ehtiyatda hələ yarım gün var. Bu vaxtadək həll etmək istəyirik” deyə Tramp qeyd edib.
O, rusiyalı həmkarı Vladimir Putinlə görüşməyi planlaşdırdığını bildirib.
“Biz bunu mümkün qədər tez etməyə çalışacağıq”, – ABŞ prezidenti əlavə edib.
Münaqişənin sona çatması üçün mümkün vaxt qrafikindən danışan Tramp deyib: “Mən prezident Putinlə danışmalıyam, biz bunu müzakirə edəcəyik”.
“Zelenski müqavilə bağlamaq istəyir. Bilmirəm, Putin bunu istəyirmi? Bəlkə də istəmir. Ancaq mütləq müqavilə bağlamalıdır. Düşünürəm ki, Rusiyanın böyük problemləri olacaq. Onların iqtisadiyyatına, inflyasiyaya baxın” deyə Tramp vurğulayıb.
Rusiyaya qarşı sanksiyaların saxlanılması ilə bağlı suala cavab olaraq o, tariflərə üstünlük verdiyini bildirib.
Tramp həmçinin bildirib ki, NATO ölkələri öz ÜDM-lərinin 5%-ni müdafiəyə xərcləməlidirlər və ABŞ-ın Ukraynaya dəstək üçün digər müttəfiq ölkələrinə nisbətən “200 milyard dollar daha çox” xərcləməsini “gülünc” adlandırıb.
