Prezident İlham Əliyev yanvarın 7-də yerli televiziya kanallarına müsahibəsində deyib ki, Azərbaycanın D-8-ə qəbul edilməsi ölkəmizin nüfuzunu bir daha göstərir.
Avropa.info xəbər verir ki,Milli Cəbhə Partiyasının başqanı, deputat Razi Nurullayev Demokrat.az-a açıqlamasında deyib ki, Azərbaycanın D-8 təşkilatına üzvlüyü ölkəmiz üçün mühüm əhəmiyyət kəsb edir:
“Bu təşkilata üzv olmaq Azərbaycanın beynəlxalq mövqeyini gücləndirir, iqtisadi, ticarət və mədəni əlaqələrin inkişafı üçün yeni imkanlar yaradır. D-8 təşkilatı iqtisadi inkişaf və əməkdaşlığı təşviq edən bir platformadır. Azərbaycanın bu quruma üzv olması, təşkilata daxil olan Türkiyə, İran, Pakistan, Malayziya, İndoneziya, Banqladeş, Misir və Nigeriya kimi ölkələrlə ticarət əlaqələrinin genişlənməsi və qarşılıqlı sərmayə qoyuluşu üçün münbit şərait yaradır. Xüsusilə kənd təsərrüfatı, enerji, sənaye və texnologiya sahələrində əməkdaşlıq perspektivləri artır. D-8 üzvlüyü Azərbaycanın ixrac imkanlarını artırır və məhsullarını yeni bazarlara çıxarmaq üçün alternativ yollar açır. Təşkilat çərçivəsində gömrük rüsumlarının azaldılması, sərbəst ticarət zonalarının yaradılması və logistika sahəsində əməkdaşlıq ölkəmizin beynəlxalq ticarətdə mövqeyini gücləndirə bilər. Azərbaycanın zəngin enerji ehtiyatları D-8 üzvü olan ölkələr üçün böyük əhəmiyyət kəsb edir. Bu üzvlük enerji sahəsində əməkdaşlığı genişləndirərək neft, qaz və bərpa olunan enerji mənbələri üzrə yeni layihələrin həyata keçirilməsinə zəmin yarada bilər. Eyni zamanda, nəqliyyat dəhlizləri və infrastruktur layihələrinin reallaşdırılması Azərbaycanın strateji əhəmiyyətini daha da artırır”.
R.Nurullayev diqqətə çatdırıb ki, D-8 üzvlüyü Azərbaycanın müsəlman ölkələri ilə siyasi əlaqələrinin dərinləşdirilməsinə töhfə verir:
“Təşkilat daxilindəki əməkdaşlıq, regionda və dünyada Azərbaycanın maraqlarını müdafiə edən daha güclü tərəfdaşlıq mexanizmləri yaratmağa imkan tanıyır. D-8 üzvü olan ölkələrlə mədəni və turizm sahəsində əməkdaşlıq Azərbaycanın zəngin tarixi və mədəniyyətinin təşviqi üçün yeni imkanlar açır. Xüsusilə İslam turizmi sahəsində layihələr və müştərək proqramlar turist axınının artırılmasına xidmət edə bilər. Azərbaycanın D-8 təşkilatına üzvlüyü ölkəmizin iqtisadi inkişafına, beynəlxalq əlaqələrinin möhkəmlənməsinə və regional inteqrasiyanın gücləndirilməsinə mühüm töhfə verəcək. Bu addım Azərbaycanın beynəlxalq nüfuzunun daha da artmasına, eləcə də regional və qlobal əməkdaşlıqların genişlənməsinə xidmət edir
