Respublika Gənclər Kitabxanasında dahi Azərbaycan şairi İmaməddin Nəsiminin 655 illiyi münasibətilə elektron məlumat bazası hazırlanıb
Avropa.info xəbər verir ki, 2024-cü ildə dahi Azərbaycan şairi və mütəfəkkiri İmaməddin Nəsiminin anadan olmasının 655 ili tamam olur. Azərbaycan xalqının çoxəsrlik ənənələrə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin zəngin irsinin təbliği məqsədilə Cəfər Cabbarlı adına Respublika Gənclər Kitabxanasında “İmaməddin Nəsimi – 655” adlı elektron məlumat bazası hazırlanıb. Məlumat bazası kitabxananın rəsmi saytında
https://ryl.az/melumat-bazalari/%C4%B0madeddin_Nesimi_el_melumat_bazasi/index.html yerləşdirilib.
Kitabxana əməkdaşları tərəfindən hazırlanan məlumat bazasında AMEA-nın prezidenti akademik İsa Həbibbəylinin “Cahana sığmayan Azərbaycan şairi”, Ziya Bünyadov adına Şərqşünaslıq İnstitutunun aparıcı elmi işçisi Səadət Şıxıyevanın “Nəsimi yaradıcılığında insanın irfani, dini və dünyəvi dərki” məqalələrinin tam mətni ilə yanaşı, “Rəsmi sənədlər”, “Görkəmli şəxslər İmadəddin Nəsimi haqqında”, “Nəsimi yaradıcılığından nümunələr”, “İmadəddin Nəsimi bədii ədəbiyyatda və incəsənətdə” kimi bölmələr də mövcuddur.
Elektron bazada dahi şairin Azərbaycan, türk, ingilis, alman, fars və rus dillərində nəşr edilən əsərləri, haqqında yazılan kitab və məqalələr, sözlərinə yazılan musiqi əsərləri, Nəsiminin həyat və yaradıcılığına həsr edilən dissertasiya və avtoreferatlar, izonəşrlər təqdim edilir. Kitabxana əməkdaşları tərəfindən hazırlanan bazada İmadəddin Nəsiminin xatirəsinin əbədiləşdirilməsi haqda məlumatlar, kitablarının virtual sərgisi, filmoqrafiyası və videoqalerayası da sərgilənir
Müəllif Avropa.info
