Qazaxıstanın Aktau şəhəri yaxınlığında qəzaya uğramış Azərbaycan Hava Yollarına (AZAL) məxsus təyyarədə sağ qalan yaralıların 7 nəfəri Bakıya gətirilib.
Avropa .info xəbər verir ki, yaralıları daşıyan Fövqəladə Hallar Nazirliyinin xüsusi təyyarəsi axşam saatlarında Heydər Əliyev adına Beynəlxalq Hava Limanına enib.
Onlar həkimlərin müşayiəti ilə ölkəyə gətiriliblər.
Hava limanında yaralıları həkimlər, hökumət rəsmiləri və yaxınları qarşılayıb.
Daha 5 nəfər isə növbəti reyslə Bakıya gətiriləcək.
Qeyd edək ki, dekabrın 25-də Bakıdan Çeçenistanın paytaxtı Qroznıya uçan Azərbaycan Hava Yollarına (AZAL) məxsus “Embrarer 190” tipli sərnişin təyyarəsi Qazaxıstanın Aktau şəhərindən bir neçə kilometr aralıda qəzaya uğrayıb.
Hava gəmisində Azərbaycan, Rusiya, Qırğızıstan və Qazaxıstandan olan 62 sərnişin, həmçinin 5 ekipaj üzvü olub.
Qəza nəticəsində 38 nəfər ölüb, 29 nəfər, o cümlədən 2 ekipaj üzvü sağ qalıb. Yaralılardan bəzilərinin vəziyyəti ağırdır.
Faktla bağlı Azərbaycan və Qazaxıstanda cinayət işi açılıb. Hər iki ölkənin hökumətləri təyyarə qəzasının səbəblərini araşdırmaq üçün komissiyalar yaradıb. Sahə tədqiqatları Azərbaycanın aviasiya administrasiyası ilə əməkdaşlıq çərçivəsində aparılır.
