“Güzəran” Sosial Araşdırmalar İctimai Birliyi “Qafqaz” televiziyasında uşaqlar üçün yol hərəkəti qaydaları mövzusunda televiziya verilişləri çəkərək yayımlayıb.
“Güzəran” Sosial Araşdırmalar İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Uşaqlar üçün təhlükəsiz yol” layihəsinə yekun vurub. Layihənin əsas məqsədi məktəblilər arasında yol hərəkəti qaydalarının təbliği ilə yol-nəqliyyat hadisələrinin sayının və bu hadisələr nəticəsində ölkəyə dəyən sosial-iqtisadi zərərin azaldılmasıdır.
Avropa.info xəbər verir ki, layihə çərçivəsində şimal bölgəsini (Quba, Qusar, Xaçmaz, Xudat, Siyəzən və Şabran rayonlarını) əhatə edən Qafqaz TV-də yol hərəkəti qaydalarının təbliği üzrə 4 televiziya verilişi çəkilərək, Qafqaz televiziyasında və televiziyanın “Youtube” kanalında yayımlanıb. Videoların sosial şəbəkələrdə yayımlanması ilə video-yazıya gələcəkdə davamlı çatım təmin ediləcək.
Layihə eksperti, yol hərəkəti qaydaları üzrə ixtisaslaşmış və 20 illik müəllimlik təcrübəsinə malik Bəxtiyar Əmirli verilişlərdə uşaqlara yol kənarı ilə hərəkət edərkən, velosiped sürərkən, ictimai nəqliyyat vasitələrindən istifadə edərkən bilməli və riayət etməli olduqları qaydalar və yol hərəkət nişanları haqqında ətraflı məlumat verib.
Verilişlərdə həmçinin valideynlər üçün uşaqların daşınması ilə bağlı qaydalar, uşaqlara valideynlər tərəfindən izzah ediməli məqamlar vurğulanıb.
Bu təşəbbüs nəticəsində hazırlanmış televiziya verilişlərinin gənclərdə yol hərəkəti qaydalarına riayət olunmanı davranış olaraq müsbətə doğru dəyişəcək və gələcəkdə uşaqların iştirakı ilə baş verə biləcək yol-nəqliyyat hadisələrinin sayının azaldılmasına öz töhfəsini verəcək.
Avropa.info
