Xəbər verdiyimiz kimi, Suriyanın devrilmiş lideri Bəşər Əsəd və ailəsi Rusiyadan sığınacaq alıb və Moskvaya yerləşib.
Avropa.info Axar.az-a istinadən xəbər verir ki, Moskvaya təyyarə ilə gələn Bəşər Əsəd və ailəsinin hava limanından olduğu deyilən görüntülər yayılıb.
Rusiya Teleqram kanalları isə bunu feyk adlandırıb və bildirib ki, bu, “Skay Nyus”un məqsədli kampaniyasıdır. Belə ki, “Skay Nyus” Bəşər Əsədin Suriyada bir xəstəxanada yatan uşağa baş çəkməsini əks etdirən kadrdan foto kəsərək, bunu yeni görüntü kimi yayıb.
Qeyd edək ki, 8 dekabrda səhər saatlarında “Heyət Təhrir əş-Şam” Dəməşqi ələ keçirərək, Əsəd rejimini devirib. Bundan sonra Bəşər Əsədin İl-76 yük təyyarəsi ilə getdiyi, lakin Suriya ərazisini tərk etmədən radarlardan itdiyi bildirilmişdi. Əvvəlcə radarlardan itən təyyarənin vurulduğu və ya qəzaya uğradığı, Bəşər Əsədin isə öldüyü ehtimalı ortaya çıxsa da, sonradan radarları söndürərək uçan təyyarənin Moskvaya istiqamətləndiyi təsdiqləndi. Belə ki, Kreml Bəşər Əsədin Rusiyadan sığınacaq aldığını, nəhayət, media vasitəsilə elan etdi.
