Rusiyanın general-polkovniki Rüstəm Muradov Rusiya Quru Qoşunlarının baş komandanının birinci müavini vəzifəsinə təyin edilib.
Avropa .info xəbər verir ki, bu təyinat Rusiya Prezidenti Vladimir Putinin sərəncamı ilə həyata keçirilib. Muradovun hərbi karyerasında bu yüksəliş onun Qafqazdan Ukraynaya qədər bir sıra hərbi əməliyyatlardakı rolu ilə əlaqələndirilir.
Rüstəm Muradovun adı Azərbaycan və Ermənistan arasında 2020-ci il müharibəsindən sonra Qarabağ bölgəsində yerləşdirilən Rusiya sülhməramlılarının komandiri kimi yadda qalıb. Onun komandanlığı dövründə Qarabağdakı sülhməramlıların fəaliyyəti bir çox qalmaqallarla müşayiət olunub. Azərbaycan cəmiyyətində Muradovun fəaliyyəti, xüsusilə də erməni separatçılarına göstərilən gizli dəstək ittihamları, narazılıqlara səbəb olmuşdu.
Muradovun Qarabağdakı bəzi addımları da mübahisəli olub. Xüsusilə, onun 2021-ci ildə Xankəndidə keçirdiyi görüşlər və separatçıların fəaliyyətinə göz yumması Azərbaycan ictimaiyyəti tərəfindən sərt tənqid edilmişdi. Azərbaycanlı hərbi analitiklər Muradovun “neytral vasitəçi” statusunu pozduğunu dəfələrlə vurğulamışdılar.
Rüstəm Muradovun yeni vəzifəsi, Rusiyanın Quru Qoşunlarının strateji idarəetməsində əsas mövqe hesab edilir. Onun Ukrayna cəbhəsində və digər bölgələrdəki fəaliyyəti bu yüksəlişi təmin etmiş ola bilər. “The Insider” nəşrinin məlumatına görə, Muradovun Ukraynadakı Avdeyevka əməliyyatlarında məsul şəxs olması və bu əməliyyatların uğursuz nəticələnməsi də təyinatla əlaqələndirilir.
Musavat.com xatırladır ki, Rüstəm Muradov Rusiya Federasiyasının Qəhrəmanı adına layiq görülmüş və “Şücaətə görə” ordeni ilə təltif edilmişdir. O, Suriyada və digər münaqişə zonalarında Rusiya üçün hərbi əməliyyatlara rəhbərlik etmiş, həmçinin beynəlxalq missiyalarda rol almışdır.
Bu təyinat Rusiya üçün Muradovun hərbi təcrübəsinə olan etibarın göstəricisidir, lakin onun Qarabağdakı fəaliyyəti Azərbaycan ictimaiyyətində unutmadıqları bir miras olaraq qalacaq.
Milli kimliyinə gəldikdə, Rüstəm Muradov Dağıstanın Dərbənd rayonunun Çinar kəndində anadan olub və tabasaran millətinə mənsubdur
