“2025-ci il dövlət büdcəsinin layihəsi əsas hədəfləri əhatə edir və cari reallıqların diktə etdiyi bir çox məsələlərin həllinə yönəlir. Büdcə layihəsi ümumilikdəm dolğun və təkmil bir sənəd kimi dəyərləndirilməlidir. Sənəddə ölkənin müdafiə potensialının gücləndirilməsinə, əhalimizin sosial təminatının yaxşılaşdırılmasına, və eyni zamanda, işğaldan azad olunmuş ərazilərin bərpasına ayrılan vəsaitin artırılması isə bu istiqamətlərin ölkə rəhbərliyinin xüsusi diqqətində olmasından xəbər verir”.
Avropa.info xəbər verir ki, bunu Milli Məclisin deputatı Kamran Bayramov parlamentdə büdcə müzakirələri zamanı deyib.
Deputat bildirib ki, büdcə zərfi işğaldan azad olunmuş ərazilərimizin bərpası ilə yanaşı, digər bölgələrimizin də sosial-iqtisadi inkişafına mühüm töhfələr verir:
“Bu töhfələr parlamentdə təmsil etdiyim Göygöl və Daşkəsən rayonlarını da əhatə edir. Lakin, həmin rayonlarda bir sıra sahələrdə işlərin sürətləndirilməsinə çox böyük ehtiyac var. Fürsətdən istifadə edərək, Göygöldə və Daşkəsəndə həlli çoxdan gözlənilən məsələlərin bir qismini iclasda iştirak edən hökumət nümayəndələrinin diqqətinə çatdırmaq istərdim.
Belə ki, Göygöl rayonunda 70 fərdi yaşayış evi olmaqla 320 nəfər əhalisi olan Firuzabad qəsəbəsində sakinlərin suvarma, kommunal-məişət, Heyvandarlıq Elmi-Tədqiqat Institutunun Təsərrüfatına məxsus 200 hektar əkin sahəsinin, damazlıq iribuynuzlu və xırdabuynuzlu heyvandarlıq fermalarının, habelə Respublika Süni Mayalanma Mərkəzinin suya olan tələbatının ödənilməsi üçün həmin qəsəbənin ərazisindən keçən Gəncə çayından qapalı su borusunun çəkilməsinə böyük ehtiyac var.
Eyni zamanda, Göygöl şəhər inzibati ərazisində yerləşən, 83 ev təsərrüfatı olmaqla 442 nəfər əhalisi olan Ağdağ qəsəbəsində içməli su və kanalizasiya sistemlərinin yenidən qurulması ilə bağlı problemlər yaşanır. Belə ki, 2014-cü ildə “Göygöl şəhərinin içməli su təchizatı və kanalizasiya sistemlərinin yenidən qurulması” layihəsi həyata keçirilsə də, eyni inzibati əraziyə aid olan Ağdağ qəsəbəsi layihəyə daxil edilməyib və hazırda qəsəbədə qeyd olunan işlərin aparılmasına ciddi zərurət yaranıb.
Bununla yanaşı, Göygölün “Sukanal” sahəsinin maddi-texniki bazasının gücləndirilməsi də zəruridir, çünki istismara yararlıq səviyyəsi aşağı olan mövcud texnikaları onun iş fəaliyyətində ciddi çətinliklər yaradır. Sahə tələb olunan ekskavator yükləyici, traktor və pikap nəqliyyat vasitəsi ilə təmin olunarsa, rayonda yaranmış qəzaların operativ və vaxtında həllinə müsbət təsirini göstərər. Qeyd etdiyim məsələlərin həlli ilə bağlı Azərbaycan Dövlət Su Ehtiyatları Agentliyindən zəruri tədbirlərin görülməsini xahiş edirəm.
Daşkəsən rayonu üzrə isə seçicilərimi ən çox narahat edən problemlərdən biri yol məsələsidir. Belə ki, uzunluğu 38 kilometr olan, sonuncu dəfə 2006-cı ildə əsaslı təmir edilmiş və hal-hazırda asfalt örtüyü tam yararsız hala düşmüş Gəncə-Daşkəsən avtomobil yolunun, habelə uzunluğu 24 kilometr olan 2300 nəfərin yaşadığı 6 yaşayış məntəqəsini birləşdirən Daşkəsən-Dəstəfur-Qıyıqlı avtomobil yolunun və uzunluğu 4 kilometr olan 400 nəfərin yaşadığı Kəmərqaya kəndinin avtomobil yolunun əsaslı təmir olunmasına çox ciddi ehtiyac yaranıb. Qeyd edilən yolların təmiri bu ərazilərin turizm potensialının reallaşdırılmasına və bölgənin sosial-iqtisadi inkişafının sürətləndirilməsinə əhəmiyyətli təkan verə bilər. Bununla əlaqədar xahiş edirəm ki, Azərbaycan Avtomobil Yolları Dövlət Agentliyi bu məsələyə ciddi diqqət yetirsin.
Daşkəsən rayonunda problemlərdən biri də qazlaşma məsələsidir. Rayonun 49 yaşayış məntəqəsindən cəmi 15-i (yəni 30,6 faizi) qazlaşıb və qazlaşma səviyyəsinə görə ən axırıncı yerdədir. Bununla əlaqədar, Dövlət Neft Şirkətindən ilkin olaraq Qabaqtəpə kənd inzibati ərazi dairəsinə daxil olan 3700 nəfərin yaşadığı 9 yaşayış məntəqəsinin və 530 nəfərin yaşadığı Əhmədli kəndinin qazlaşdırılması məsələsinə baxılmasını xahiş edirəm.
Daşkəsənlə bağlı problemlərin qabartmağımın ayrıca səbəbi də var: gələn il Daşkəsən rayonunun yaranmasının 95 illik yubileyidir. Üzücü bir faktdır ki, Daşkəsən şəhərində sakinlərin istirahət etməsi, gənclərin asudə vaxtının səmərəli təşkili üçün yarandığı tarixdən bu günə qədər heç bir park, idman meydançası və idman qurğuları yaradılmayıb. Hesab edirəm ki, rayon üçün əlamətdar olan gələn ildə Daşkəsən şəhərinin abadlaşdırılması, eyni zamanda şəhərdaxili küçələrin işıqlandırılması, küçələrə asfalt örtüyünün vurulması və istinad divarlarının təmir edilməsi daşkəsənlilər üçün yubiley tarixində ən böyük hədiyyə olardı”.
Avropa.info
