Azərbaycan Kənd Qadınları Assosiasiyası İB ölkədə kollektiv qadın aqro-bizneslərini idarə etmək üçün 50 Qadln İnkişaf və Müəssisə Qrupunun səfərbər olunmasına və onların Milli Şəbəkəsinin yaradılmasına nail olub.
Assosiasiya 14 potensial Qadın İnkişaf və Müəssisə Qrupunun uğurlu nəticələrinə əsasən onların İstehsal-İstehlak Qadın Kooperativi olaraq hüquqi status almasına dəstək verib.
Təsərrüfatla məşğul olan qadınların Fermer – Qadın Qrupu – Qadın Kooperativi istiqamətində təşkilatlanması uğurla davam edir.
Kollektiv qadın aqro-bizneslərinin Milli Şəbəkəsi çərçivəsində Lənkəran rayonunun İstisu qəsəbəsində yeni fəaliyyətə başlamış “İvradamon” Feyxoa İstehsalçıları Kooperativi ilə Bərdə rayonunda fəaliyyət göstərən “Fatimə” İstehsal-İstehlak Qadın Kooperativi arasında qarşılıqlı əməkdaşlıq görüşü keçirilib. Görüşdə hər iki kooperativi təmsil edən 30 fermer iştirak edib.
Görüşə ev sahibliyi edən “Fatimə” Qadın Kooperativinin Sədri Zümrüd Hüseynova Azərbaycan Kənd Qadınları Assosiasiyasının 2019-cu ildə Bərdə rayonunun Böyük Göyüşlü kəndində yaratdığı FATİMƏ Qadın Qrupunun təşkilatlanaraq 2023-cü ildə İstehsal-İstehlak Qadın Kooperativinə çevrilməsi barədə məlumat verib.
Zümrüd xanım onu da vurğulayıb ki, FATİMƏ Qadın Qrupu ilk fəaliyyətə başlayanda 17 qadın fermer bir araya gələrək kollektiv şəkildə tərəvəz becərirdilər, sonralar satışdan gələn gəlir hesabına qrupdakı qadınların hər birinə 1 inək aldılar və heyvandarlıqla da məşğul olmağa başladılar.
“Kollektiv biznesimiz böyüdükcə kənddəki digər işsiz qadınları da işlə təmin etdik. Hal-hazırda üzvlərimizin toplam 38 hektar torpaq sahəsində kələm, pomidor, qarpız, badımcan, bibər və kartof becəririk, kənddəki bütün fermerlər üçün əlçatan olan Aqrar Xidmətlər Mərkəzi yaratmışıq, tarlalarımızda yüksək məhsuldarlıq var.
Heyvandarlıq sahəsində də uğurlarımız var, təsərrüfatlarımızda inəklərin sayı artıb, qadınlarımız ətlik-südlük heyvanlar saxlamaqla ailələri üçün əlavə gəlir vasitələri yaradırlar. ”
“İvradamon” Feyxoa İstehsalçıları Kooperativinin Sədri Rəftarə Şükürova Lənkəranda feyxoa bağlarının becərilməsi və “Sitrus Vadisi” Aqrar Turizm Mərkəzinin fəaliyyəti barədə məlumat verərək əməkdaşlığın yaranıb möhkəmlənməsi üçün “Fatimə” Qadın Kooperativinin üzvlərini Lənkərana, rəhbərlik etdiyi “İvradamon Kooperativinin fəaliyyəti ilə tanış olmağa dəvət edib. Qadınların rəhbərlik etdiyi hər iki kooperativ arasında məhsul mübadiləsinin mümkünlüyü də vurğulanıb.
Görüş iştirakçıları “Fatimə” Qadın Kooperativinin tərəvəz tarlalarına və heyvandarlıq sahələrinə baxış keçirib, Aqrar Xidmətlər Mərkəzinin fəaliyyəti ilə tanış olublar.
Avropa.info
